काठमाडौं । नेकपा (माओवादी) केन्द्रका अध्यक्ष पुष्पकमल दाहाल प्रचण्डले प्रधानमन्त्री केपी शर्मा ओलीलाई कारवाही गर्न माग गर्नुभएको छ ।
ओलीले निर्वाचन आचारसंहित उल्लंघन गरेको भन्दै कारवाहीका बिहीबार हुन लागेको राष्ट्रिय सभा उपनिर्वाचनमा नेकपा (एमाले) का अध्यक्षसमेत रहेका ओलीले आचारसंहिता उल्लंघन गरेको दाहालको आरोप छ ।
दाहालका प्रमुख स्वकीय सचिव जोखबहादुर महराले बुधबार विज्ञप्ति प्रकाशित गरी ओलीले एमाले उम्मेद्वार रामबहादुर थापालाई विजयी बनाउन मतदातालाई गरेको अपिलप्रति गम्भीर ध्यानाकर्षण भएको जनाएका छन् ।
‘केपी शर्मा ओली नेकपा (एमाले)का अध्यक्ष मात्र नभएर नेपाल सरकारका प्रधानमन्त्री समेत हुनुहुन्छ । स्वतन्त्र, स्वच्छ र मर्यादित निर्वाचन सम्पन्न गर्नु सरकारको दायित्व हो’ विज्ञप्तिमा भनिएको छ, ‘यस विपरित सरकार प्रमुखले नै अमूक उम्मेद्वारलाई विजयी गराउन मतदाताहरुलाई अपिल गरेर निर्वाचनमा प्रभाव पार्नु, स्वच्छ, निष्पक्ष र भयरहित निर्वाचनको आधारभूत सिद्धान्तको खिलाफमा छ।’
प्रचण्डको सचिवालयले मौन अवधिमा सार्वजनिक वक्तव्य मार्फत अमूक उम्मेद्वारलाई विजयी गराउन आग्रह गर्दै मतदाताहरुलाई दिएको धम्कीले आचार संहिताको गम्भीर उल्लंघन भएको जनाएको छ ।
‘यस्तो स्थितिमा हुने निर्वाचन स्वच्छ र निष्पक्ष हुने कसरी अपेक्षा गर्न सकिन्छ? प्रधानमन्त्रीको यस कार्यको निन्दा र भत्र्सना गर्दै आवश्यक कारवाहीका लागि निर्वाचन आयोग समक्ष आग्रह गर्दछु’ विज्ञप्तिमा भनिएको छ ।
जेष्ठ ३ गते राति १२ बजेदेखि मौन अवधि शुरु भइसकेको सन्दर्भमा गरिएको यसप्रकारको अपिल निर्वाचन आचार संहिता विपरित भएको स्वयम् निर्वाचन आयोगले सचेत गराइसकेको छ ।
भोलि हुने वागमती प्रदेशको राष्ट्रियसभा उपनिर्वाचनका लागि एमालेका तर्फबाट थापा र माओवादी–कांग्रेसका तर्फबाट खिमलाल देवकोटा उम्मेदवार रहनुभएको छ ।
