काठमाडौँ । सङ्खुवासभामा निमार्णाधीन ९०० मेगावाटको अरुण तेस्रो जलविद्युत परियोजनाको विद्युत गृहस्थलको काम गत बुधबारदेखि ठप्प भएको छ । सुरुङभित्र मजदुरको मृत्यु भएपछि क्षतिपूर्तिको माग गर्दै मजदुरले आयोजना स्थलका निर्माण सामग्रीमा तोडफोड गरेका थिए ।
अवरुद्ध भएको अरुण तेस्रो आयोजनाको काम सञ्चालन गर्न सतलज कम्पनी र सरोकारवाला निकायसँग छलफल भइरहेको र चाँडै आयोजनाको काम सञ्चालन गर्ने सङ्खुवासभाका प्रमुख जिल्ला अधिकारी टेकनारायण पौडेलले जानकारी दिनुभयो ।
बुधबार बिहान साढे ८ बजे सुरुङभित्र बारुद राख्ने गर्ने क्रममा माथिबाट खसेको ढुङ्गाले लागेर कञ्चनपुर शुक्लाफाँट नगरपालिका–१२ का ३७ वर्षीय कृष्ण रानाको मृत्यु भएको थियो भने सोही स्थानका ५० वर्षीय मिठु राना घाइते भएका थिए । विद्युतगृह निर्माणको जिम्मेवारी पाएको पटेल इन्जिनियरिङ लिमिटेडले जिम्मेवारीबाट पन्छिन खोजेको भन्दै कामदार दिनभर आन्दोलित भएका थिए ।
शव व्यवस्थापनका लागि चन्दा सङ्कलन गर्ने भनेपछि कामदारले आयोजनाको कार्यालय र सवारी साधनमा ढुङ्गामुढा गरेका थिए ।
कामदारहरू आक्रोशित भएपछि निर्माण कम्पनीले रु. ५० हजार क्षतिपूर्ति दिने भने पनि रु. ५० लाख बिमा रकम हुने भन्दै सो रकमको माग गरेको मृतकका भाइ रामस्वरूप रानाले बताउनुभयो । अन्त्यमा आयोजनाले रु. ३० लाख दिने सहमति जनाएपछि शव जिम्मा लिएको मृतकका भाइ रामले बताउनुभयो ।
मृत्यु भएका मजदुरको शव परिवारले जिम्मा लिए पनि विद्युतगृहको निर्माण कार्य सुरु हुन सकेको छैन । काम गर्ने सहज वातावरण नभएको भन्दै सहज परिस्थिति नभएसम्म काम सुरु गर्न नसक्ने भारतीय सतलज जलविद्युत निगम (एसजेभिएन) प्रमुख कार्यकारी अधिकृत अरुण धिमानले बताउनुभयो ।
नेपाल सरकारले सुरक्षाको प्रत्याभूति गराए मात्र आयोजनाको काम सुरु गर्न सक्ने उहाँले जानकारी दिनुभयो । जुनसुकै घटनामा क्षतिपूर्तिका नाममा ठुलो रकमको माग गर्दै आयोजनामा अवरोेध गर्ने गरेकाले काम गर्न असहज भएको उहाँको भनाइ छ ।
कुल रु. एक खर्ब ४४ अर्ब लागत निर्माण भइरहेको आयोजनाको काम २०२२ मा उत्पादन सुरु गर्ने लक्ष्य लिएको छ । अरुण तेस्रो जलविद्युत्को निर्माणको काम एसजेभिएनले गरिरहेको छ ।
मकालु गाउँपालिका–५ फ्याक्सिन्दा दोभानमा अरुण तेस्रो बाँधस्थल र चिचिला गाउँपालिका–२ दिदिङ पुखुवामा विद्युत गृहस्थलमा निर्माण कार्य भइरहेको छ । विद्युत गृहस्थल पुखुवामा भारतीय पटेल इन्जिनियरिङ कम्पनीले काम गरिरहेको छ । यी दुई कम्पनीमार्फत अन्य २० भन्दा बढी साना निर्माण कम्पनीले काम गरिरहेको आयोजनाले जनाएको छ । अरुण तेस्रो जलविद्युत परियोजनामा भारतीय र नेपालीसहित तीन हजारभन्दा बढी मजदुर कार्यरत छन् । (रासस)
