दाङ । दाङका क्रियाशील राजनीतिक दलहरूले कोभिडको व्यवस्थित उपचारको माग गर्दै ६ बुँदे प्रेसविज्ञप्ति जारी गरेका छन् ।
राष्ट्रिय जनमोर्चाका अध्यक्ष गणेश आचार्य, नेकपा (माओवादी–केन्द्र) का इन्चार्ज जीवन गौतम, नेपाली काङ्ग्रेसका सचिव शङ्कर डाँगी, नेकपा (माओवादी–केन्द्र) का सचिव सुभाष पुन, नेकपा (एमाले) का उपसचिव शुरामणि बेलबासे र जनता–समाजवादी पार्टीका प्रदेश सदस्य प्रकाश विष्टको हस्ताक्षरमा २०७८ वैशाख २७ गते जारी गरिएको प्रेसविज्ञप्तिमा यस्तो माग राखिएको हो ।
प्रेसविज्ञप्तिको पूर्ण पाठ यस्तो छ–
“आज २०७८ वैशाख २७ गते दाङमा क्रियाशील राजनीतिक शक्तिहरूको संयुक्त बैठक घोराहीमा सम्पन्न भएको छ । कोभिड महामारीको प्रभाव दिनानुदिन बढिरहेको परिवेशमा बसेको संयुक्त बैठकले जनतालाई प्रभावकारी रूपमा स्वास्थ्यसेवा उपलब्ध गराउने विषयमा छलफल गरेर सरकरसमक्ष तपसिल माग तत्काल पूरा गर्न अनुरोध गरिएको छ ः
१. दाङका सबै पालिकामा अक्सिजनसहितका आइसोलेसन बेडको व्यवस्था गर्न, पिसिआर टेस्टका लागि स्वाब सङ्कलन गर्ने व्यवस्था मिलाउन अनुरोध गर्दछौँ ।
२. निःशुल्क पिसिआर टेस्ट एवम् उपचारको व्यवस्था मिलाउन अनुरोध गर्दछौँ ।
३. दाङ अस्पतालमा अक्सिजनको अभावले बिरामीको उपचारमा समस्या देखिएको छ । अक्सिजनको सहज आपूर्तिको व्यवस्था मिलाउन अनुरोध गर्दछौँ ।
४. घोराहीको राप्ती विज्ञान प्रतिष्ठानमा गत वर्ष नै आइसियु बेड सञ्चालनार्थ उद्घाटन गरिएको थियो । तर हालसम्म पनि आइसियु बेड सञ्चालन गरिएको छैन । तत्काल आइसियु बेड सञ्चालन गर्न र थप आइसियु बेडको व्यवस्था गरी सञ्चालनमा ल्याउन अनुरोध गर्दछौँ ।
५. सर्वसाधारण जनतालाई कोभिड उपचार बनाउन सम्बन्धित सबैमा अनुरोध गर्दछौँ ।
६. प्रादेशिक अस्पताल तुलसीपुर र राप्ती स्वास्थ्य विज्ञान प्रतिष्ठानलाई पूर्ण कोभिड अस्पताल बनाउन अनुरोध गर्दछौँ ।
यस महामारीको समयमा अहोरात्र खटिने, विभिन्न राहत सहयोगमा लाग्ने स्वाथ्यकर्मी, प्रशासन, सेनाप्रहरी, सामाजिक सङ्घसंस्था एवम् जनसमुदायमा हार्दिक धन्यवाद ज्ञापन गर्दछौँ । हाम्रा दलका सबै नेता–कार्यकर्तामा आवश्यक सावधानीसहित जनताको राहत र सेवामा लाग्न अपिल गर्दछौँ ।”
