काठमाडौं । नेपाल कम्युनिस्ट पार्टी(मसाल) ले १३२औँ मे दिवसको अवसरमा विश्वका सबै मजदुरहरूमा हार्दिक शुभकामना व्यक्त गरेको छ । सम्पूर्ण मानवजातिको मुक्तिको सपना, आशा र विश्वासको प्रतीकको रुपमा मजदुर दिवसको ऐतिहासिकता कायम रहँदै आएको मसालले जनाएको छ ।

महामन्त्री मोहनविक्रम सिंहले जारी गर्नुभएको शुभकामना सन्देशमा कोरोना भाइरस महामारीको घटनाले विश्वमा सबैभन्दा बढी मजदुरहरु प्रभावित भएको उल्लेख गर्नुभएको छ ।

महामन्त्री सिंहले ‘सम्पूर्ण मजदुरहरुलाई असीम आशा, विश्वास र भरोसाका साथ अगाडि बढ्नका लागि’ शुभकामना व्यक्त गर्नुभएको छ ।

शुभकामना सन्देशमा भनिएको छ,
१३२ औँ मे दिवसको अवसरमा विश्वका सबै मजदुरहरूमा नेपाल कम्युनिस्ट पार्टी(मसाल)ले हार्दिक शुभकामना व्यक्त गर्दछ । विगत वर्षदेखि शुरु भएको कोरोना भाइरसको विश्वव्यापी महामारीको प्रकोप अहिलेसम्म कायम रहँदै आएकोले भौतिक रूपमा उपस्थित भई यो दिवस मनाउन नसकिएको भएपनि मे १ को ऐतिहासिक दिनले निर्देशन गरेको मुक्तिको उद्देश्यमा संसारका मजदुरहरू अगाडि बढिरहने कुरा स्पष्ट छ । हामीले यस अवसरमा सम्पूर्ण मजदुरहरुको उत्तरोत्तर प्रगति र सुस्वास्थ्यको कामना गर्दछौँ ।

मजदुर दिवस खालि औपचारिक परम्परा मात्र नभएर मजदुरवर्गका विभिन्न कालखण्डका ऐतिहासिक सङ्घर्षले स्थापित गरेका अधिकार र तिनको मूल्यको संरक्षण गर्दै भविष्यको विश्वलाई समृद्ध र शान्तिपूर्ण बनाउने महान उद्देश्यद्वारा निर्देशित रहेको निरन्तर मुक्तिको अभियान पनि हो । सम्पूर्ण मानवजातिको मुक्तिको सपना, आशा र विश्वासको प्रतीकको रुपमा मजदुर दिवसको ऐतिहासिकता कायम रहँदै आएको छ । विश्वका जति पनि आविष्कार रहेका छन्, ती सबै मजदुर वर्गको श्रम, सीप र क्षमताका उपलब्धि हुन् । तिनै उपलब्धिको जगमाथि टेकेर आजको मानवजातिले नयाँनयाँ सफलता पाउँदै गइरहेको छ । जब विश्वमा मजदुर रहने छैन, त्यसपछि संसारमा कुनै आविष्कार पनि बाँकी रहने छैनन् र मानवजातिले कुनै विकास र परिवर्तन पनि गर्न सक्ने छैन । त्यसैले राजनीतिक, आर्थिक, सामाजिक तथा सांस्कृतिक परिवर्तनको मुख्य र निर्णायक शक्ति मजदुर वर्ग अधिकार सम्पन्न हुन अनिवार्य छ । जबसम्म मजदुरवर्ग अधिकार सम्पन्न हुने छैन, तबसम्म मानवजातिअन्तर्गत रहेका विभिन्न विभेद र असमानताका खाडल कुनै न कुनै रुपमा कायम रहिरहने छन् । त्यसले विश्वमा अशान्ति, असमानता, विभेदयुक्त राजनीतिक, आर्थिक र सामाजिक प्रणालीको माध्यमबाट मानवजातिमाथि शासन गर्नेछ । त्यसका विरुद्ध मजदुरवर्गले सँधै क्रान्तिको बाटोमा हिँड्नुपर्ने छ ।

कोरोना भाइरस महामारीको घटनाले सिद्ध गरिसकेको छ कि विश्वमा सबैभन्दा बढी मजदुरहरु प्रभावित भए र उनीहरुको स्वास्थ्यसुविधा, रोजगार, अधिकार र अन्य सुविधामा अनेक कटौती भएका छन् । कतिपयले जीवन गुमाएका छन् भने कतिपयले रोजगार गुमाएका छन् । त्यसरी विश्वका मजदुरमा विभिन्न समस्या उत्पन्न भएका छन् । अहिले उनीहरुको हकअधिकारको विषय पनि एउटा गम्भीर समस्याको रूपमा अगाडि आएको छ । कोरोना कहरको विपत्ति सहँदै विदेश भूमिमा लाखौँ नेपालीहरु मजदुरको रुपमा कार्यरत छन् । विश्वमा आएको मजदुरसम्बन्धीको संकटबाट ती लाखौँ नेपाली मजदुर पनि प्रभावित प्रभावित भएका छन् । कतिपयले रोजगार गुमाएर स्वदेश फर्कनुपरेको छ भने कतिपय अवस्थाको जटिल बन्न गएको छ । त्यस प्रकारको समस्यामाथि ध्यान दिएर नेपालको सरकारले नेपालमा नै रोजगारी व्यवस्थापनको कार्यलाई सुनिश्चित र व्यवस्थित गर्नका लागि कुनै ठोस योजना र कार्यक्रम पनि अगाडि सारेको छैन ।

हामीले जोड दिन्छौँ कि, एकातिर, वैदेशिक रोजगारमा रहेका नेपाली मजदुरहरुमाथि अन्तर्राष्ट्रिय कानुनमा व्यवस्था भएका सुविधा अनुसार व्यवहार गरिनुपर्दछ । उनीहरुको जीवनको सुरक्षा, सुविधा र अन्य कानुनी हकको सुनिश्चितता हुनुपर्दछ । अन्तर्राष्ट्रिय कानुनी व्यवस्था अनुसार आफ्ना नागरिकहरुको सुविधा र सुरक्षाको रेखदेखका लागि नेपाल सरकारले ध्यान पु¥याउनु पर्दछ । त्यसका साथै अर्कातिर, देशभित्रका मजदुरहरूमाथि भएका बिभिन्न शोषणको अन्त्य गर्दै जीविकाको सुनिश्चिता सहित उनीहरुका बिभिन्न अधिकार, सुरक्षा र हितमाथि ध्यान दिनाका लागि पनि हामी सरकारको ध्यान आकर्षण गर्दछौँ ।

यस दिवसको अवसरमा हामीले मजदुरहरूलाई यो सन्देश दिन चाहन्छौँ कि मजदुरवर्गले आफ्ना मागको विषयका साथसाथै सामाजिक परिवर्तन, न्याय र समानताको लागि राजनीतिक चेतना र क्षमताको स्तरलाई पनि उठाउँदै लैजानुपर्दछ । त्यसका लागि उनीहरूले मुक्तिको उद्देश्य पूरा गर्ने राजनीतिक संगठनमा संगठित भएर राजनीतिक आन्दोलनमा पनि भाग लिनुपर्दछ र सामाजिक परिवर्तनको दायित्वलाई पूरा गर्दै जानुपर्दछ ।

अन्तमा हामीले सम्पूर्ण मजदुरहरुलाई असीम आशा, विश्वास र भरोसाका साथ अगाडि बढ्नका लागि शुभकामना व्यक्त गर्दछौँ ।

२०७८ वैशाख १८ गते ।
मोहनविक्रम सिंह
महामन्त्री