काठमाडौं । जनता समाजवादी पार्टीले लुम्बिनी प्रदेशमा सहभागी भएका चार सांसदलाई कारवाही गरेको छ । पार्टी नीतिविपरीत प्रदेश सरकारमा सहभागी भएको भन्दै जसपाले उनीहरूलाई पार्टीको साधारण सदस्य साथै सांसदबाट समेत निस्कासन गरेको हो ।
सो सम्बन्धी पत्र प्रदेशसभा सचिवालयमा पठाएपछि सचिवालयले बिहीबार उनीहरूको पद रिक्त भएको जानकारी दिएको छ। कारवाहीमा पर्नेहरूमा सन्तोषकुमार पाण्डेय, विजयबहादुर यादव, समुन शर्मा र कल्पना पाण्डे रहेका छन् । आफूविरुद्ध अविश्वास प्रस्तावमा हस्ताक्षर गरेका तीनसहित जसपाका चार सांसदलाई मुख्यमन्त्री शंकर पोखरेलले वैशाख ६ मा मन्त्री बनाएका थिए ।
जसपाका अध्यक्ष उपेन्द्र यादव र संघीय परिषद अध्यक्ष बाबुराम भट्टराई पक्षले बहुमतका आधारमा ती चार सांसदलाई कारबाही गरेपछि अर्का अध्यक्ष महन्थ ठाकुर र वरिष्ठ नेता राजेन्द्र महतो पक्षले आपत्ति जनाएको छ ।
बाबुराम भट्टराई र उपेन्द्र यादवले पत्र पठाएर उनीहरूलाई कारवाही गरेको भन्दै ठाकुर पक्षले केन्द्रीय कार्यकारीणी समितिको बैठक नै नबसेको र आफूहरूको त्यसमा सहमति नभएको भन्दै प्रदेश सभामा अर्को पत्र पठाएको छ । जसमा पार्टीले चार सांसदलाई कारवाही नगरेको उल्लेख छ ।
जसपामा ओली सरकारलाई समर्थन गर्ने वा नगर्ने विषयमा तीब्र विवाद हुँदै आएको छ । महन्थ–राजेन्द्र पक्ष ओलीको समर्थनमा खुलेका छन् भने उपेन्द्र–बाबुराम विपक्षमा देखिँदै आएका छन् ।
जसपामा भूईंचालो : ठाकुर र महतो ओली सरकारमा जान तयार भएपछि बाबुराम-उपेन्द्र असन्तुष्ट
