काठमाडौं । नेकपा (एमाले) ले पार्टीका वरिष्ठ नेता माधवकुमार नेपाल र झलनाथ खनाललाई स्थायी समितिबाट हटाएको छ । पार्टीको महाधिवेशन आयोजक समितिको शुक्रबार प्रधानमन्त्री निवासमा बसेको बैठकले नेपाल पक्षलाई हटाएर नयाँ स्थायी समिति गठन गरेको हो ।

प्रधानमन्त्री एवम् अध्यक्ष केपी ओलीले गठन गरेको सो समितिमा पूर्वप्रधानमन्त्री तथा एमालेका वरिष्ठ नेता नेपाल, उपाध्यक्ष भीम रावल, उपमहासचिव घनश्याम भुसाल र स्थायी समिति सदस्य सुरेन्द्र पाण्डेलाई हटाइएको छ ।यी चारै जना नेतालाई पार्टीसम्बन्धी विवादमा स्पष्टीकरण सोधेर ६ महिनाका लागि निलम्बन गरिएको छ ।

त्यसैगरी नेपाल पक्षमा रहेका वरिष्ठ नेता झलनाथ खनाल, अष्टलक्ष्मी शाक्य, युवराज ज्ञवाली, मुकुन्द न्यौपाने, गोकर्ण विष्ट, भीम आचार्य, योगेश भट्टराई र अमृत बोहरालाई स्थायी समितिबाट हटाइएको छ ।

एमालेको नयाँ स्थायी समितिमा पूर्वमाओवादी नेताहरु रामबहादुर थापा, लेखराज भट्ट, टोपबहादुर रायमाझी र मणि थापालाई थपिएको छ । यस्तै, रघुविर महासेठ र विष्णु रिमाललाई पनि स्थायी समितिमा थपिएको छ । यस्तै बैठकले स्पष्टीकरण सोधिएका नेता नेपालसहितका २७ सांसदको निर्णय गर्ने अधिकार स्थायी समितिलाई दिएको छ ।

कर्णालीमा ‘फ्लोर क्रस’ गर्ने चार सांसद निष्काशित
नेकपा एमालेले कर्णाली प्रदेशमा पार्टी ह्विप उल्लंघन गर्दै फ्लोर क्रस गरी मुख्यमन्त्री महेन्द्र बहादुर शाहीलाई विश्वासको मत दिने चार प्रदेश सांसदलाई पार्टीबाट निष्काशन गरेको छ । महाधिवेशन आयोजक समितिको बैठकले प्रदेश सांसदहरु प्रकाश ज्वाला, अम्मरबहादुर शाही, कुर्मराज शाही र नन्दसिंह बुढालाई पार्टीबाट निष्काशन गरेको हो ।

पार्टीले कारबाही गरेसँगै उनीहरुको सांसद पद समेत खारेज हुने प्रक्रिया अघि बढ्नेछ । मुख्यमन्त्री शाहीले आफूविरुद्धको अविश्वासको प्रस्तावमा यही वैशाख ३ मा विश्वासको मत लिएका थिए ।
यस्तै, सुरुमा शाहीलाई विश्वासको मत दिए पनि पछि सच्याउँदै फिर्ता लिने सांसद देवी वली भने कारबाहीबाट जोगिएकी छन् ।