काठमाडौं । राष्ट्रिय जनमोर्चाले संसदमा विचाराधिन अमेरिकी सहयोग नियोग मिलेनियम च्यालेन्ज कर्पोरेसन (एमसीसी) पारित गर्न नहुने अडान दोहोर्याएको छ । शनिबार प्रधानमन्त्री केपी शर्मा ओलीले आयोजना गरेको सर्वदलीय बैठकमा राजमो सचिव हिमलाल पुरीले एमसीसी कुनै पनि हालतमा पारित गर्न नहुनेमा जोड दिनुभएको हो ।
प्रधानमन्त्री ओलीले कोरोना संक्रमणको नियन्त्रण, उपनिर्वाचनलगायत समसामिक विषयमा छलफल गर्न सर्वदलीय बैठक आव्हान गर्नुभएको हो । बैठकमा राजमोका तर्फबाट सचिव पुरी सहभागी हुनुभएको थियो ।
बैठकपछि युगदर्शनलाई संक्षिप्त प्रतिक्रिया दिँदै नेता पुरीले भन्नुभयो, ‘एमसीसी पारित गर्न प्रधानमन्त्रीको दल एमाले, नेपाली कांग्रेस र मधेशवादी दलहरुको जोड देखियो । नेमकिपाले पनि यसबारेमा ढुलमुले अभिव्यक्ति दिएको छ । तर हामीले एमसीसी पारित गर्न नहुनेमा स्पष्ट अडान राख्यौं ।’
राजमो सचिव पुरीले एमसीसी सम्झौता केवल आर्थिक सहयोग मात्रै नभएर नेपालको सार्वभौमिकतामा अमेरिकी हस्तक्षेपको आमन्त्रण भएको कुरालाई आफूले बैठकमा राखेको जानकारी दिनुभयो । उहाँका अनुसार एमसीसी संसदबाट जसरी पनि पास गर्ने ‘मुड’ मा प्रधानमन्त्री देखिनुभएको छ । अब बस्ने संसदको पहिलो बैठकमै एमसीसी पेश गर्ने सम्भावना देखिएको छ ।
पुरीका अनुसार बैठकमा सहभागी दलका नेताहरुले कोरोना संक्रण बढ्दै गइहरेको भन्दै त्यसको प्रभावकारी नियन्त्रणका लागि सरकारले अग्रसरता लिनुपर्ने धारणा राखेका थिए । सरकारले लकडाउन गर्ने हल्ला चलिरहेका बेला नेताहरुले तत्काल लकडाउन नगर्न बरु सबै नेपालीलाई खोप लगाउने व्यवस्था मिलाउन सुझाव दिएका छन् ।
यस्तै संघीय संसद, प्रदेश तथा स्थानीय तहमा रिक्त स्थान पूर्तिका लागि संविधानमा व्यवस्था भएबमोजिम निर्वाचन गराउन पनि दलहरुले सुझाव दिएका छन् ।
सभामुखप्रति प्रधानमन्त्रीको आक्रोश
प्रधानमन्त्री केपी शर्मा ओलीले सभामुख अग्निप्रसाद सापकोटाको भूमिकालाई लिएर आक्रोश व्यक्त गर्नुभएको छ । बैठकमा प्रधानमन्त्री ओलीले एमसीसीलाई छलफलको विषय बनाउन सभामुख सापकोटाले नमानेको आरोप लगाउनुभएको थियो ।
सरकारले राखेको एमसीसीलगायत विभिन्न विधेयकहरुलाई सभामुखले अगाडि बढाउन नचाहेको ओलीको आरोप थियो । ओलीलाई कांग्रेस र जसपाका नेताहरुले साथ दिएका थिए ।
‘सरकारले ल्याएको एजेन्डामा छलफल हुनैपर्छ, यसमा कसैले रोक्नु हुँदैन,’ कांग्रेस र जसपाका नेताहरूले बैठकमा भने । यस्तै, जसपाले संसदमै अड्किएको नागरिकता विधेयकलाई अगाडि बढाउन सुझाव दिएको थियो ।
बैठकमा राजमो सचिव पुरीले अध्यादेशबाट शासन गर्न खोज्ने सरकारको तरिका गलत भएको भन्दै संसदलाई प्रभावकारी रुपमा अघि बढाउन सुझाव दिनुभएको थियो ।
बैठकमा प्रधानमन्त्रीसहित सरकारका मन्त्रीहरु, नेपाली कांग्रेसका सभापति शेरबहादुर देउवा, रामचन्द्र पोडेल, बिमलेन्द्र निधि, बालकृष्ण खाँड, जनता समाजवादी दलबाट महन्थ ठाकुर, लक्ष्मणलाल कर्ण र सर्वेन्द्रनाथ शुक्ल, नेमकिपाबाट प्रेम सुवाल र सुनिल प्रजापति, राप्रपाबाट डा. प्रकाशचन्द्र लोहनीलगायत नेताहरु सहभागी थिए ।
नेकपा (माओवादी केन्द्र) का अध्यक्ष प्रचण्डलाई बैठकमा बोलाइएपनि माओवादी र एमालेको नेपाल पक्षले बैठक बहिष्कार गरेको थियो ।
