काठमाडौं । दुई वर्षअघि सरकारसँग सम्झौता गरेर पृथकतावादी गतिविधि छोडेका सीके राउतले फेरि ‘स्वतन्त्र मधेश’ को नारा लगाएका छन् । राउत नेतृत्वको जनमत पार्टीको हालै सम्पन्न महाधिवेशनमा ‘स्वतन्त्र मधेश’ लेखिएको ब्यानर टाँगिएको हो ।

पृथकतावादी गतिविधि त्याग्न प्रतिवद्धता गरेपछि राउतसँग प्रधानमन्त्री केपी ओलीले जेलबाट निकालेर सम्झौता गर्नुभएको थियो । राउतसँगको सम्झौतापछि नेपालमा पृथकतावाद सधैँका लागि खत्तम भएको सरकारको भनाई थियो ।

राउतको पृथकतावादी कार्यप्रति नेकपा (एमाले) का नेता भीम रावलले आपत्ति प्रकट गर्नुभएको छ । सोमबार बिहान सामाजिक सञ्जालमा ट्वीट गर्दै डा. रावलले प्रधानमन्त्री केपी अ‍ेलीको मौनताप्रति प्रश्न उठाउनुभएको छ ।

रावलले लेख्नुभएको छ, ‘सीके राउतसँगको सम्झौतामा दुई देश बीच जस्तो भाषा प्रयोग र सभागृहमा महान व्यक्तित्व झैं किन प्रस्तुत गरियो भनी मैले कुरा उठाएको थिएँ । जवाफमा ‘स्वतन्त्र मधेश’को नारा छोडेको भनिएको थियो । तर हालै सीके राउतको सम्मेलनमा ‘स्वतन्त्र मधेश’ को ब्यानर–झण्डा राखिएकोप्रति प्रम केपी किन मौन ?’

सीके राउतसंगको सम्झौतामा दुई देश बीच जस्तो भाषा प्रयोग र सभागृहमा महान व्यक्तित्व झैं किन प्रस्तुत गरियो भनी मैले कुरा उठाएको थिएँ।जवाफमा ‘स्वतन्त्र मधेश’को नारा छोडेको भनिएको थियो।तर हालै सीके राउतको सम्मेलनमा ‘स्वतन्त्र मधेश’ को ब्यानर-झण्डा राखिएको प्रति प्रमं केपी किन मौन?

— Bhim Rawal, PhD (@BhimRawal179) April 12, 2021

सीके राउत नेतृत्वको जनमत पार्टीको जनकपुरधाममा सम्पन्न पहिलो महाधिवेशनले नयाँ कार्यसमितिको चयन गरेको छ । राउतलाई कायम राख्दै अन्य पदमा निर्वाचन गराइएको सो पार्टीले जनाएको छ । निर्वाचनबाट उपाध्यक्ष पदमा मोहम्द अब्दुल खान, ई। बसन्त कुशवाहा, ई। दीपक कुमार साह र ई. नरेन्द्र प्रसाद चौधरीले विजयी भएका छन् । महासचिवमा चन्दन कुमार सिंह चुनिएका छन् ।