काठमाडौं । नेकपा–एमालेको खनाल-नेपाल समूह प्रधानमन्त्री एवम् पार्टी अध्यक्ष केपी शर्मा ओलीले बोलाएको केन्द्रीय कमिटि र संसदीय दलको बैठकमा नजाने भएको छ । अध्यक्ष ओलीले भोलि (शनिबार) केन्द्रीय कमिटि र संसदीय दलको बैठक बोलाउनुभएको छ ।
नेपाल समूहका स्थायी कमिटी सदस्यहरुको आज बानेश्वरमा बसेको बैठकले सो निर्णय गरेको हो । बैठकले विगतमा संसदीय दलको बैठक दलको कार्यालय, सिंहदरबार वा संसद् भवन, बानेश्वरमा बस्दै आएकोमा यस पटक प्रधानमन्त्रीको निवासमा राखेर दललाई निजीकरण गर्न खोजिएको ठहर गर्दै त्यसमा सहभागी नहुने निर्णय गरेको छ ।
‘केन्द्रीय कमिटी बैठकका नाममा आफ्ना गुटका मानिसलाई मात्र खबर गरी फागुन २८ गते अवैध ढंगले भेला गरी विधान उल्लंघन गरिएकाले उक्त कथित बैठक खारेज नभएसम्म केन्द्रीय कमिटीको बैठक बस्न नसक्ने’ सो समूहले जनाएको छ ।
उनीहरुले नेकपा–एमालेका सबै सांगठनिक संरचना र पार्टीका निर्णयहरुलाई २०७५ जेठ २ गतेका अवस्थाबाट सुरुवात नगरेसम्म ओलीले आयोजना गर्ने बैठकमा सहभागी नहुने बताउँदै आएका छन्। एमाले उपाध्यक्ष भीम रावलले पार्टी विधानलाई मिचेर केन्द्रीय कमिटीमा सदस्य थप गरिएको बताउँदै ती अवैधानिक नियुक्तिहरु खारेज नभएसम्म केन्द्रीय कमिटीको बैठकमा पनि सहभागी नहुने बताउनुभयो ।
उहाँले पार्टीको विधान महाधिवेशन र विधान सम्मेलनले मात्रै संशोधन गर्नसक्ने हुँदा अन्यत्र गरिएका हेरफेर स्वीकार नगर्ने बताउनुभयो । त्यसैगरी पार्टीको संरचनाहरु सर्वोच्च अदालतको फैसलाअनुसार २०७२ जेठ २ गतेको अवस्थामा पुर्याउनु पर्ने र त्यसो नगरेसम्म आफूहरु बैठकमा सहभागी नहुने उहाँको भनाई थियो ।
नेकपा एमालेको बिहीबार बसेको संसदीय दलको बैठकले गठन गरेको संसदीय बोर्डमा वरिष्ठ नेता झलनाथ खनाल र माधवकुमार नेपाल नबस्ने भएका छन् ।
शुक्रबार नयाँ बानेश्वरमा भएको खनाल नेपाल समूहका स्थायी कमिटीका सदस्यहरुको अनौपचारिक छलफलमा दुवै नेताहरुले विधान नै बनाइ नसकेको संसदीय दलको बैठकले बोर्ड गठन गर्नु हास्यास्पद भएको बताए ।
खनाल नेपाल समूहले बहिष्कार गरेको एमाले ससदीय दलको बिहीबारको बैठकले संसदीय दलका नेता केपी शर्मा ओलीको संयोजकत्वकमा २७ सदस्यीय बोर्ड गठन गरेको थियो । जसमा खनाल र नेपाल पनि सदस्य रहेका छन् ।
