बेलबहादुर रजाली/जयपुर (भारत) ।।
राजस्थानको जयपुरबाट हराएकी नेपाली महिला सङ्गीता विश्वकर्मालाई भेटाएर परिवारलाई जिम्मा लगाइएको छ ।

बागलुङ जिल्ला, ताराखोला गाउँपालिका वडा नं. ३, हिल घर भई हाल राजस्थान जयपुरको शास्त्रीनगर भट्टाबस्तीमा बसोबास गर्दै आएका प्रभुलाल विश्वकर्माकी २७ वर्षीया श्रीमती सङ्गीता विश्वकर्मा घरमा श्रीमान र आठ वर्षको छोरालाई छाडी साथमा ९ महिनाको बच्चा लिएर जनवरी २६, २०२१ का दिन हराएकी थिएन् ।

खोजी गर्ने क्रममा आफ्नै घरबेटीको दाइको छोरा ३० वर्षीय अरविन्द असवालसँग आफ्नी श्रीमती भागेको कुरा प्रभुलालले थाहा पाएका थिए । त्यसको रिपोर्ट प्रभुलालले शास्त्री नगर पुलिस थाना तथा मूल प्रवाह अखिल भारत नेपाली एकता समाज नगर समिति जयपुरलाई दिएका थिए । यस अवधिमा आफ्नो ८ वर्षको छोरो मम्मीलाई सम्झेर दैनिक रोइरहन्थ्यो भने प्रभुलाल आफू पनि निकै चिन्तित अवस्थामा थिए । उता, पुलिस थानामा जाँदा पुलिसले सहयोग नगरेको र खोजबिन गर्न ढिलासुस्ती गरेको पाउँथे ।

मूल प्रवाह अखिल भारत नेपाली एकता समाजले घटनालाई गम्भीरताका साथ हेर्न र खोजबिन प्रक्रियालाई द्रुतगतिमा अगाडि बढाउन पुलिसमाथि दबाब सिर्जना गरिरहेको थियो । करिब डेढ महिनापछि पुलिसले निज महिलालाई हिजो राती गुडगाँवबाट फेला पारेको छ । आज बिहान मूल प्रवाह अखिल भारत नेपाली एकता समाजलाई पुलिसले महिला भेटिएको जानकारी गराएको थियो । साथै संगठनको रोहबरमा परिवारलाई जिम्मा लगाइदिने मनसाय पुलिसको रहेको पनि बताएको थियो ।

तत्कालै नगर समिति जयपुर उत्तरका अध्यक्ष रामप्रकाश शर्मा, उपाध्यक्ष मङ्गलसिंह खड़का, कोषाध्यक्ष नारायण पौडेल, सदस्य ताराप्रसाद शर्मालगायत अन्य कार्यर्ताहरुको टोली पुलिस थानामा गई उहाँहरूको उपस्थितिमा सङ्गीता विश्वश्वकर्माको परिवारजनलाई जिम्मा लगाईएको छ । अब निज सङ्गीताले पहिलाकै अवस्थामा परिवारसँग मिलेर बस्ने प्रतिबद्धता व्यक्त गरेकी छिन् भने अब उनीहरू छिट्टै नेपाल जाने योजनामा रहेको सङ्गीताका पति प्रभुलालले बताए ।