काठमाडौं । सरकार र नेत्र विक्रम चन्द ‘विप्लव’ नेतृत्वको नेपाल कम्युनिस्ट पार्टीबीच आज (बुधबार) वार्ता हुने भएको छ । परराष्ट्रमन्त्री प्रदीप ज्ञवालीले बुधबार बिहान सरकारी वार्ता टोलीका संयोजक गृहमन्त्री रामबहादुर थापा ‘बादल’ र विप्लव नेतृत्वको नेकपाका महासचिव नेत्रविक्रम चन्दको फोटो सामाजिक सञ्जालमा राखेर वार्ता सफलताको शुभकामना दिनुभएको छ ।
लामो समयदेखिका सहयात्री गृहमन्त्री थापा र विप्लव केही वर्षअघि मात्रै अलग भएका थिए । तत्कालिन एकीकृत नेकपा माओवादीबाट मोहन वैद्यको नेतृत्वमा थापा र विप्लवलगायतको समूह अलग भएको थियो । पछि विप्लवले छुट्टै भूमिगत समूह निर्माण गरी संघर्ष अगाडि बढाउनुभएको थियो भने थापाको समूह पनि वैद्यबाट अलग भएर प्रचण्ड नेतृत्वको माओवादी केन्द्रमा समाहित भएको थियो।
वार्ताको सफलताका लागि हार्दिक शुभकामना !
( फोटो सौजन्य- नेपाल प्रेस) pic.twitter.com/qfTXMZDx2N— Pradeep Gyawali (@PradeepgyawaliK) March 3, 2021
नेकपा (एमाले) र माओवादी केन्द्रबीच एकता भएर बनेको नेकपाका सचिवालय सदस्य थापा हाल गृहमन्त्रीको जिम्मेवारीसँगै ओली नेतृत्वको नेकपाका नेता हुनुहुन्छ ।
विप्लव समूहसँग वार्ताको प्रयास गरेको सरकारले सरकारले मंगलबार गृहमन्त्री थापाको संयोजकत्वमा प्रधानमन्त्री केपी शर्मा ओलीका परराष्ट्र सल्लाहकार डाक्टर राजन भट्टराई रहेको २ सदस्यीय वार्ता टोली गठन गरेको हो । लगत्तै विप्लव नेकपाले पनि प्रवक्ता खड्गबहादुर विश्वकर्मा ‘प्रकाण्ड’ र नेता दीपक रहेको वार्ता टोली गठन गरेको थियो ।
हिजो (मंगलबार) गठन गरिएका सरकार र विप्लवका वार्ता टोलीबीच हिजै वार्ता गर्ने तयारी गरिए पनि विप्लव पक्षले केही सर्त राखेपछि समय सरेको हो । विप्लव नेकपाका एक नेताका अनुसार आफूहरूले पहिला पार्टीमा लागेको प्रतिबन्ध फुकुवा र जेलमा रहेका आफ्ना नेतारकार्यकर्ता रिहा गरिनुपर्ने माग राखेपछि हिजो वार्ता हुन नसकेको हो ।
हिंसात्मक तथा आतंककारी गतिविधि गरेको भनी सरकारले २०७५ फागुन २८ गते विप्लव समूहलाई प्रतिबन्ध लगाएको थियो । प्रतिबन्धयता सरकारले विप्लवका झण्डै दुई हजार कार्यकर्तालाई पक्राउ गरेको छ।
