काठमाडौं । नेपाली कांग्रेसका सभापति शेरबहादुर देउवासँग भारतीय राजदूत विनयमोहन क्वात्रा र चिनियाँ राजदूत होउ यान्छीले छुट्टाछुट्टै भेटघाट गरेका छन् । प्रतिनिधि सभा विघटनको निर्णय बदर भएसँगै ‘भावी प्रधानमन्त्री’ का रुपमा हेरिएका देउवासँग दुई छिमेकी मुलुकका राजदूतले गरेको भेटघाटलाई अर्थपूर्णरुपमा हेरिएको छ ।
स्रोतका अनुसार बिहीबार नेपाली कांग्रेसको पदाधिकारी बैठक सकिएलगत्तै देउवा निवास बूढानीलकण्ठमा भारतीय राजदूत क्वात्राले भेटवार्ता गरेका हुन् । त्यसको एक दिनअघि फागुन १२ गते चिनियाँ राजदूत होउ यान्छीले पनि देउवालाई उहाँकै निवासमा पुगेर भेट गरेकी हुन् ।
गत फागुन ११ गते सर्वोच्च अदालतले प्रतिनिधि सभा विघटनको निर्णय बदर गर्ने फैसला गरेको थियो । प्रतिनिधि सभा पुनर्स्थापना भए देउवा पुनः प्रधानमन्त्री बन्ने धेरैले अड्कल काटेका छन् ।
विभाजित नेकपाको प्रचण्ड–नेपाल पक्षले देउवालाई प्रधानमन्त्री बन्न आग्रह गरेको समाचार सार्वजनिक भएको थियो । फागुन १२ गते देउवा निवासमै पुगेर नेकपाका अध्यक्षद्वय पुष्पकमल दाहाल र माधवकुमार नेपालले प्रधानमन्त्री बन्न आग्रह गरेको खबर बाहिरिएको थियो ।
प्रचण्ड–नेपालले भेटेलगत्तै चिनियाँ राजदूत यान्छीले देउवासँग भेटवार्ता गरेकी हुन् भने त्यसपछि भारतीइ राजदूतले पनि देउवासँग भेट गरेका छन् ।
यता, प्रधानमन्त्री केपी ओलीले संसद पुनर्स्थापना पछि पनि आफू नै प्रधानमन्त्रीमा निरन्तर रहने त्यसका लागि नेपाली कांग्रेससँग सत्ता साझेदार गर्ने र आफू प्रधानमन्त्रीबाट हट्नुपर्ने अवस्था आए प्रचण्ड–नेपाललाई सरकारमा जान नदिन देउवालाई नै प्रधानमन्त्री बनाउने रणनीति बनाएको प्रधानमन्त्री निकट नेताहरुको अभिव्यक्तिले पुष्टि गर्छ ।
संसदको अंकगणित र राजनीतिक अवस्थाका कारण देउवा नै प्रधानमन्त्री बन्ने सम्भावना देखिएको बेला देउवासँग भेटघाट बढाउन छिमेकी देशका राजदूतहरुले आफ्नो सक्रियता पनि बढाउन थालेका छन् ।
