मार्तडी । बाजुराको बुढीगङ्गा नगरपालिका–३ स्थित पशुपति माध्यमिक विद्यालयको पर्खाल निर्माणमा काम गरेका मजदुरले एक वर्षसम्म पनि ज्याला पाएका छैनन् ।
सो विद्यालयको पर्खाल निर्माणमा काम गरेको एक वर्ष बितिसक्दा पनि उनीहरूले ज्याला नपाएका हुन् ।
विद्यालयको पर्खाल निर्माणका लागि आएको रकम नगरपालिकाले भुक्तानी गरिसक्दा पनि आफूहरूले ज्याला नपाएको मजूदर भीमबहादुर रौलेले बताए । नगरपालिकाको आर्थिक वर्ष २०७६÷७७ को आठ लाख रकम बिलअनुसार भुक्तानी गरेको भए पनि काम गर्ने मजदुरले भने ज्याला नपाएको उनको गुनासो छ ।
उपभोक्ता समितिका अध्यक्ष सुशीला रौलेले रकम बुझेर ल्याएको भए पनि आफूलाई ज्याला नदिएको अर्का मजदूर अमृत देउवाको भनाइ छ । काम गरेको एक वर्षसम्म पनि पर्खाल निर्माण समितिका पदाधिकारीले सरकारी दररेटअनुसार नदिएको ज्यालामा विवाद आएको छ ।
पटक–पटक पर्खाल निर्माण समितिसँग काम गरेको ज्याला माग्दा थोरै रकम दिने र सरकारी दररेटको रकम नदिने मजदुर देउवाले दुखेसो पोखे । उनले पर्खाल निर्माणको ज्याला नपाएको भन्दै बुढीगङ्गा नगरपालिकाको न्यायिक समितिमा उजुरी गरेको भए पनि कुनै सुनुवाइ नभएको पनि बताए ।
नगरपालिकामा दिएको उजुरी न्यायिक समितिका संयोजक तथा नगरपालिकाका उपप्रमुख तारा खातीले वडामै मिलाउन भनेर उजुरी फिर्ता गरेको देउबाको छ । विद्यालयको पर्खाल निर्माण समितिका अध्यक्ष तथा पशुपति माध्यमिक विद्यालय व्यवस्थापन समितिका अध्यक्ष सुशीला रौलेले पर्खाल निर्माण उद्घाटनका बेला तत्कालीन प्रधानाध्यापक रामबहादुर रावलले सरकारी दररेटका कुरा उठाएकाले मजदुरले पनि सोही दररेटमा ज्याला पाउनुपर्ने माग राख्दै काम गरेको रकम बुझ्न नमानेको बताए ।
नगरपालिकाको प्राविधिकले बनाएको इस्टिमेटअनुसार काम नभएकाले सम्झौता भएअनुसारको रु. ८ लाख भुक्तानी नभएकाले प्रतिव्यक्ति रु. ३५० का दरले दिने सहमति भएको र केही व्यक्तिले सो रकममा सहमति नजनाएकाले उनीहरुले एक महिनादेखि ज्याला नलिएको उनले स्वीकार गरे ।
पटक–पटक ज्याला बुझ्न बोलाउँदा र छलफल गर्दासमेत सरकारी दररेट ९५० का दरले काम गरेको रकम पाउनुपर्ने मजदुरले अडान लिएपछि ज्याला दिन नसकेको अध्यक्ष रौलेको भनाइ छ । उनका अनुसार ज्याला नलिनेमा २१ मजदुर छन् । तीमध्ये वीरसिङ्गे रौले, भीमबहादुर रौले, राजेन्द्र रौले, बलबहादुर रौले चन्द्रबहादुर रौलेलगायतका छन् । यस्तै ज्याला नपाउनेमा चक्रशाह, उद्धव रौले, भरत रौले, प्रकाश रौले, प्रेमबहादुर रौले, अमृत देउवा, चन्द्रदेव जैशी र मोतिलाल जैशी छन् ।
यता बुढीगङ्गा नगरपालिकाका उपप्रमुख तथा न्यायिक समितिका संयोजक खातीले ज्याला नपाएको उजुरी न्यायिक समितिमा नआएको बताए । उनले उजुरी न्यायिक समितिमा नआएकाले ज्याला पाए/नपाएको विषयमा खोज्दै हिँड्न नहुने बताउँदै उजुरी आएमा छलफल गरेर मजदुरलाई ज्याला उपलब्ध गराइदिएर न्याय दिने बताए ।(रासस)
