परासी । बैतडीको दोगडाकेदार गाउँपालिकाकी १७ वर्षीया किशोरी भागरथी भट्टको बलात्कारपछि पाशविक ढङ्गले भएको हत्याको विषयमा नवलपरासीमा विरोधसभा सम्पन्न भएको छ ।
भागरथीकी अपराधीलाई कारबाहीका लागि शान्तिपूर्ण कार्यक्रममा हिजो अखिल (छैठौँ) र राष्ट्रिय जनमोर्चाका नेता–कार्यकर्तामाथि धरपकड गरेर सरकारले फासिवादी शैली अपनाएको विरोधमा आज माघ २६ गते मुलुकभरि कार्यक्रम गर्ने क्रममा सुनवल नगरपालिका–१० गैडाखालमा सो कार्यक्रम सम्पन्न भएको हो ।
विरोध कार्यक्रममा राष्ट्रिय जनमोर्चा जिल्ला सल्लाहकार तथा नेपाल सुकुम्बासी सङ्घका केन्द्रीय उपाध्यक्ष उत्तमराज खरेलले निर्मला हत्याकाण्डजस्तै भागरथी भट्टका हत्यारालाई पनि उम्काउन सक्ने हँुदा राष्ट्रिय जनमोर्चाले सरकारलाई दबाब दिन खोजेको बताउनुभयो ।
कार्यक्रममा राष्ट्रिय जनमोर्चा जिल्लाध्यक्ष किसनबहादुर अधिकारी, अखिल नेपाल महिला सङ्घकी जिल्लाध्यक्ष सम्झना सुवेदी, अखिल नेपाल जनजाति सम्मेलन जिल्लाध्यक्ष शेरबहादुर सूर्यवंशी र अखिल नेपाल किसान महासङ्घ नवलपरासी जिल्लाध्यक्ष जितबहादुर पौडेलले समेत मन्तव्य राख्नुभएको थियो ।
राष्ट्रिय जनमोर्चा सुनवल वडा नं. १० का अध्यक्ष देविराम सरभुजाको अध्यक्षता र धनपति सापकोटाको सञ्चालनमा विरोध कार्यक्रम भएको थियो ।
