बुटवल । राष्ट्रिय जनमोर्चा लुम्बिनी प्रदेश सांसद तारा जिसीले प्रदेशको वर्तमान बोझिलो संरचना सहित संघीयताको खारेजी राष्ट्रिय जनमोर्चाको माग मात्र नभएर सम्पूर्ण नेपाली जनताको माग भएको बताउनुभएको छ ।

प्रदेश सभा स्थापनाको तीन वर्षको अवसरमा ‘संघीयता कार्यान्वयनमा प्रदेश सभा’ समिक्षात्मक अन्तरक्रिया कार्यक्रममा राजमो नेतृ जिसीले प्रदेशको आफ्नै आयको कुनै श्रोत नभएको अबस्थामा एकातर्फ केन्द्रको अनुदान र अर्को तर्फ जनताको ढाडै सेकिने गरी चर्को कर लगाएर बनाइने बजेटको प्रदेश सभाले विना कामै ठूलो हिस्सामा ‘गुलछर्रा’ उडाएको कटाक्ष गर्नुभयो । उहाँले प्रदेश सभा र सांसदहरु समाज चुस्ने जुका जस्तो भएको समेत सर्बत्र महसुस भएको बताउनुभयो ।

नेतृ जिसीले प्रदेश सभाले बनाउनु पर्ने ११६ कानुन मध्ये ६५ वटा पास गरे पनि ५९ वटा मात्र प्रमाणीकरण भएको बताउँदै अति आवश्यक र महत्वपूर्ण महिला, जनजाती, दलित जस्ता विधेयकले अझैसम्म पनि प्रवेश नपाउनु आश्चर्यजनक रहेको बताउनुभयो ।

प्रदेश भरका गुणस्तरहिन, लावारिस विकास योजनाहरुमा सरकार र विभागीय कर्मचारीहरुको मिलिमतोमा भ्रष्टाचार मौलाएको भन्दै प्रदेश बाट हुने अनुगमन नाम मात्रको र फितलो प्रवृतीको रहेको औल्याउदै प्रोत्साहनको लागी भनेर दिइने अनुदान वास्तविक अनुग्राही सम्म नै नपुगेको,सन्तुलित विकास नीति भनिए पनि कागजमा सिमित रहेको र प्रदेशको स्थाइ राजधानी र नामाकरणको प्रश्नमा पनि बिषयले प्रबेश पाउदैका दिन आफूले पार्टीको धारणा राख्दै बिशेष समितिको आवश्यकता नभएको, समय र रकमको दूरुपयोग मात्र हुने भनी दुइ तिहाइ बहुतको सरकारले सदन बाटै निर्णय गर्ने अधिकार भएको विषय उठाए पनि ध्यान नदिएको बताउनुभयो ।

उहाँले भन्नुभयो, ‘आखिर उक्त बिषय सदन बाटै विवाद सहित टुङ्ग्याउनै पर्यो।’

समग्रमा प्रदेशको आजसम्मको समिक्षा ‘मूरी लगानी गरेर मानो उपलब्धि’ भएको उहाँले बताउनुभयो ।

संघीयता अन्तर्गतको तामझाम सहितको बर्तमान बोझिलो प्रदेश संरचना रहे देशको सार्वभौमिकता र अखण्डता समेतमा खतरा पुग्ने उहाँको भनाई छ ।

उहाँले भन्नुभयो, ‘मुख्यतः आर्थिक रुपले देशले संघीयता धान्न सक्दैन । आम जनतामा पनि विनाकामको यो संरचना प्रति वितृष्णा पैदा हुँदै गएको छ र हामी घृणाका पात्र बनेका छौँ ।’

उहाँले समय छँदै सोचौं र जतीसक्दो छिटो संघीयता खारेज गरौं भन्नुभयो । संचारकर्मीहरुको बाक्लो उपस्थिति रहेको उक्त कार्यक्रममा सभामुख पूर्णबहादुर घर्ती र उप सभामुख कृष्णि थारुले पनि विचार राख्नुभएको थियो ।