दाङ । राष्ट्रिय जनमोर्चा दाङको एकमहिने “वडावडामा सभा : टोलटोलमा समिति” अभियानअन्तर्गत घोराही उपमहानगरपालिका वडा नम्बर ५ को धर्नामा केपी ओली सरकारको असंवैधानिक कदमका विरुद्ध विरोधसभा सम्पन्न भएको छ ।
२०७७ माघ १७ गते सम्पन्न सो कार्यक्रमबाट राष्ट्रिय जनमोर्चाको वडा भेला सम्पन्न गर्दै समिति समेत पुनर्गठन गरिएको छ ।
कार्यक्रममा राजमो दाङका जिल्लाध्यक्ष गणेश आचार्यको प्रमुख अतिथिको आसनबाट सम्बोधन गर्दै केपी ओली सरकारको असंवैधानिक, अलोकतान्त्रिक र अधिनायकवादी कदमका विरुद्ध सम्पूर्ण जनता जुरुक्क उठेर आन्दोलनमा लाग्नुपर्ने आवश्यकतामा जोड दिनुभयो । यस प्रकारको स्प्रिटले आन्दोलन गरे मात्र विघटित प्रतिनिधि सभा पुनःस्थापित हुनसक्ने उहाँको भनाइ थियो ।
कार्यक्रममा राजमोका जिल्ला सदस्य चन्द्रबहादुर नेपाली, राजमो घोराही नगर समितिका अध्यक्ष हरि खरेल, जातीय समता समाजका जिल्ला सचिव बलदेव विकलगायतले मन्तव्य राख्नु भएको थियोे ।
सूर्यलाल नेपालीको अध्यक्षतामा अघि बढेको सो कार्यक्रमको सहजीकरण नगर सदस्य तेजनारायण आचार्यले गर्नुभएको थियोे ।
भेलाले सूर्यलाल नेपालीको अध्यक्षताम एक स्थान रिक्तसहित १५ सदस्यीय वडा समिति गठन गरेको छ । समितिको उपाध्यक्षमा तेजनारायण आचार्य, सचिवमा बलदेव विक, सहसचिवमा अर्जुन नेपाल, कोषाध्यक्षमा रिता नेपाली र सदस्यहरूमा पूर्ण नेपाली, सिवलाल नेपाली, सन्तोष नेपाली, कुमानन्द नेपाली, पूर्ण नेपाली, कमला विश्वकर्मा, सिबा केसी, कुमानन्द नेपाली, लोकबहादुर केसी र प्रीतिराम नेपाली रहनुभएको छ ।
