कमल पौडेल/खलङ्गा ।
ओली सरकारको असंवैधानिक कदमको विरोधमा राष्ट्रिय जनमोर्चा प्युठानले माघ महिना भरी १ महिने कार्यक्रम को घोषणा गरेको छ ।
राजमो नेता आनन्द शर्माको प्रमुख आतिथ्यतामा आज (मङ्गलबार) आयोजित कार्यक्रमद्वारा उपर्युक्त योजना बनाइएको हो ।
कार्यक्रममा राजमो नेता आनन्द शर्माले प्रमुख अतिथिको आसनबाट मन्तव्य राख्दै नेकपाको कार्यदिशा नै गलत भएको हुँदा देशमा समस्या झनै बल्झिदै गएको बताउनुभयो । नेकपामा दूरगामी सोचाइ नहुँदा आफ्नै पार्टी टुटफुटको अवस्थामा आएको उहाँको भनाइ थियो । उहाँले प्रतिनिधि सभाको पुनः स्थापनाको विषयलाई लिएर सबै बस्ती बस्तीमा पुगी जनतालाई सचेत गराउनुपर्नेमा जोड दिनुभयो ।
कार्यक्रममा राजमो नेता सुरेश थापाले अहिलेसम्म प्राप्त नेपाली जनताका सबै अधिकारलाई वर्तमान सरकारले कुल्चन खोजेको हुँदा अब सबै नेपाली सचेत भई सरकारलाई खबरदारी गर्नुपर्ने बेला आएको बताउनुभयो ।
उहाँले वडादेखि जिल्लासम्मका सबै कार्यक्रमको कार्यतालिकासमेत प्रस्तुत गर्नुभएको थियोे ।
कार्यक्रममा राजमोका केन्द्रीय सदस्य बासुदेव पोख्रेल, प्रदेश सांसद तारा जिसी, नेकपा (मसाल) प्युठानका प्रवक्ता ज्ञामुराम न्यौपाने, जिल्ला समन्वय समिति प्युठानका प्रमुख केशवराज आचार्यलगायतका नेता तथा कार्यकर्ताहरूको उपस्थिति रहेको थियो ।
राष्ट्रिय जनमोर्चाका केन्द्रीय सदस्य तथा प्युठान जिल्लाध्यक्ष कृष्णबहादुर खड्काको अध्यक्षता तथा जिल्ला उपाध्यक्ष इमानसिंह खड्काको स्वागत मन्तव्य अगाडि बढेको थियो ।
कार्यक्रमको सञ्चालन राजमोका जिल्ला सचिव विदुर मल्लले गर्नुभएको थियो ।
