धनगढी । केलालीमा राष्ट्रिय जनमोर्चा र सम्बद्ध जनवर्गीय संगठनहरुको संयुक्त भेला सम्पन्न भएको छ । भेलाले प्रतिनिधि सभाको पुनर्स्थापना, संघीयता खारेजी, भ्रष्टाचारको विरोध, राष्ट्रियता र गणतन्त्र रक्षाका लागि माघ महिनाभरी संघर्षका कार्यक्रम तय गरेको छ ।
घोषित कार्यक्रम अनुसार माघ ३ गतेदेखि १६ गतेसम्म विभिन्न स्थानीय तहमा दैनिक विरोध सभाको आयोजना गरिनेछ भने माघ १६ गते अत्तरियामा विशाल जनसभाको आयोजना गरिनेछ । माघ १७ देखि फागुन १ गतेसम्म संगठन निर्माणको योजना बनाइएको राजमो केन्द्रीय सदस्य एवम् सुदूर पश्चिम इन्चार्ज मनोज भट्टले जानकारी दिनुभयो ।
पुस २७ गते धनगढीमा पत्रकार सम्मेलन गरिन कार्यक्रमबारे आम जनतालाई जानकारी गराइनेछ भने माघ ३ गते फूलबारीमा उद्घाटन सभाको आयोजना गरिनेछ । यस्तै, ४ गते गदरिया, ५ गते जोशीपुर, ६ गते पथरैया, ७ गते लम्की, ८ गते सुख्खड, ९ गते चौमाला, १० गते कुचैनी, ११ गते स्याउलेबजार, १२ गते गोदावरीको ओलानी, १३ गते चौकिडाँडा, १४ गते राजपुर र १५ गते धनगढी हसनपुर पिपलचौतारामा विरोध सभाको आयोजना गरिने राजमो कैलालीले जनाएको छ ।
कार्यक्रमका दौरानमा दैनिक मसाल जुलुशको आयोजना गरिनेछ भने सम्भव भएसम्म दैनिक दुईवटा कोणसभा गरिनेछ ।
त्यस लगत्तै १७ गते सबै जनवर्गीय संगठनको संयुक्त बैठक बसी कार्यक्रमको समीक्षासँगै संगठन निर्माणलाई अघि बढाइनेछ ।
शनिबार सम्पन्न संयुक्त भेलाको उद्घाटन राजमो केन्द्रीय सदस्य मनोज भट्टले गर्नुभएको थियो भने जनवर्गीय संगठहरुको तर्फबाट जातीय समता समाजका केन्द्रीय सदस्य तिलक परियार, अखिल नेपाल महिला संघका केन्द्रीय सल्लाहकार चन्द्रबदन श्रेष्ठ, महिला संघका जिल्ला उपाध्यक्ष अञ्जना श्रेष्ठ, अखिल नेपाल बुद्धिजीवी संघका जिल्ला कोषाध्यक्ष शोभामणी भट्ट, अखिल (छैठौं) का जिल्ला अध्यक्ष जनक आचार्यले शुभकामना मन्तव्य व्यक्त गर्नुभएको थियो ।
कार्यक्रममा वरिष्ठ वामपन्थी नेता आरसी भट्ट, राजमो केन्द्रीय सदस्य नन्दराज भट्ट, नेकपा (मसाल) जिल्ला प्रवक्ता मिलन शाही, अखिल नेपाल किसान संघका केन्द्रीय सदस्य हरिकृष्ण पाण्डे, राजमो केन्द्रीय सल्लाहकार शेरबहादुर विक, प्रदेश सदस्य लक्षीराम आचार्य, रक्तिमका बाबुराम आचार्य, शिक्षक संघका नरेश भट्ट, जनजाती सम्मेलनका खडक रानालगायत नेताहरुको आतिथ्यता रहेको थियो ।
राजमो कैलालीका अध्यक्ष दयाराम सञ्ज्यालको अध्यक्षता तथा सचिव जगत जोशीको सञ्चालनमा भएको कार्यक्रममा जिल्ला सदस्य गोरबहादुर विकले स्वागत गर्नुभएको थियो ।
