काठमाडौं । नेपाल कम्युनिष्ट पार्टी (मसाल)का महामन्त्री मोहनविक्रम सिंहले प्रतिनिधि सभा विगटनको असर राष्ट्रियतामा समेत पर्न सक्ने आशंका व्यक्त गर्नुभएको छ । बुधबार काठमाडौंको बानेश्वरमा प्रचण्ड–नेपाल नेतृत्वको नेकपाले आयोजना गरेको अन्तर्क्रिया कार्यक्रममा महामन्त्री सिंहले प्रतिनिधि सभा विगटनको असर संविधान, गणतन्त्र, धर्मनिपेक्षता र राष्ट्रियतामाथि पर्न बताउनुभयो ।
‘अहिलेको समस्या संसद विघटनको मात्र होइन, यसको धेरै असर पर्न सक्छ’, सिंहले भन्नुभयो, ‘हाम्रो संविधान, गणतन्त्र, धर्मनिरपेक्षता र राष्ट्रियतामा पर्न सक्छ ।’
लामो संघर्षपछि प्राप्त भएका उपलब्धि प्रधानमन्त्री ओलीको असंवैधानिक कदमबाट गुम्ने भन्दै उहाँले त्यसलाई गम्भीर रुपमा लिनुपर्ने बताउनुभयो । उहाँले प्रधानमन्त्रीको कदमले संविधान माथि नै कुठाराघात भएको आरोप पनि लगाउनुभयो । सिंहले संसद पुनर्स्थापनाका लागि संयुक्त संघर्षमा जान दलहरुसँग आग्रह पनि गर्नुभयो ।
कार्यक्रममा प्रचण्ड–नेपाल नेतृत्वको नेपाल कम्युनिस्ट पार्टी (नेकपा)का अध्यक्ष माधवकुमार नेपालले प्रधानमन्त्री केपी शर्मा ओलीको ध्वंसात्मक प्रवृत्तिले सबैलाई दुःख दिने बताउनुभयो । अध्यक्ष नेपालले ओलीको कदम नेकपाका नेतालाइ तह लगाउन मात्रै भएको भन्ने नठान्न कांग्रेसललगायतका अन्य दललाई आग्रह गर्नुभयो ।
‘ध्वंसात्मक प्रवृत्तिले सबैलाई दुःख दिन्छ’, नेपालले भन्नुभयो, ‘तपाईंहरुलाई लागेको हुनसक्दछ यो नेकपाभित्रका नेताहरुलाई मात्र तह लगाएको होला, नेकपाको आन्तरिक मामिला होला। भित्र दनादन दनक दिइरहेका छन् भन्नेठान्नुहोला, यस्तो कदमले कसैलाई बाँकी राख्दैन् ।’
पूर्व प्रधानमन्त्री एवं जनता समाजवादी पार्टी (जसपा)का राष्ट्रिय परिषद् अध्यक्ष डा. बाबुराम भट्टराईले प्रधानमन्त्री केपी शर्मा ओलीले संविधान भन्दा माथिबाट समग्र व्यवस्थालाई नै कू गरेको आरोप लगाउनुभयो । प्रधानमन्त्री ओलीले गरेको कू २०१७ सालमा राजा महेन्द्र र २०६०/६१मा राजा ज्ञानेन्द्रले गरेको कू जस्तै भएको उहाँको भनाई थियो ।
उहाँले भन्नुभयो ‘केपी ओलीको नेतृत्वमा नेपालमा जुन प्रतिगमनकारी घटना घट्यो पुस ५ गते यो समान्य होइन । मेरो विचारमा १७ सालमा राजमा महेन्द्रले जुन कू गरे र ६०/६१ सालमा राजा ज्ञानेन्द्रले जुन कू गरे त्यसैको हाराहारिको यो कू हो । संवैधानिक कू होइन । त्यो त संविधान अन्तर्गत हुन्छ । संविधान माथिको कू हो । व्यवस्था माथिको कू हो । त्यसो हुनाले यसलाई समान्य अर्थमा लिने गल्ती कसैलेपनि नगरौं ।’
