काठमाडौं । विगत १३ वर्षदेखि निरन्त रुपमा वालसाहित्य प्रकाशन गर्दै आइरहेको कथालयले बालबालिकालाई लक्षितगरि तीन पुस्तक प्रकाशन गरेको छ ।
नेपाली लेखकले नेपाली परिवेश समेटेर लेखेका बालकथा ‘मनोहरको मुरली’, ‘सफा झिँगा’ र ‘सेल्फीको रहर’ एकैसाथ प्रकाशन भएका हुन् ।
बालबालिकासँग अनेक रहर, सीप र क्षमता हुन्छन् ।
साथीहरुसँग मिलेर नयाँ नयाँ कुरा सिक्ने कौतुहलताको कथा ‘मनोहरको मुरली’ मा लेखक नारायणश्री अधिकारीले लेखेका छन् । चित्रकार विनिता बुद्दाचार्यले बनाएका चित्रले कथाका यी घटनाक्रम झनै सहज ढंगले बुझन सघाउँछन र कथालाई अझै रोचक बनाएका छन् ।
तेजप्रकाश श्रेष्ठको लेखन र विजयराज शाक्यको चित्रकारिता रहेको ‘सफा झिँगा’ मा बालबालिकालाई सरसफाइ र रोगबाट बच्ने उपायहरुको जानकारी कथाको माध्यमबाट दिइएको छ ।
‘सेल्फीको रहर’ कथामा लेखक रामदेव पाण्डेले मुसा र बिरालोलाई मानवीकरण गर्दै बालबालिकालाई प्रविधि बारे सचेत गराउन खोजेका छन् । चित्रकार ध्रुव प्रजापतिले बनाएका चित्रले कथाक्रमलाई रमाइलोसँग बुझ्न सहयोग पुर्याउछन् ।
