काठमाडौँ । हालै नेपाल सरकारले कृषिक्षेत्रमा कृषिप्रविधि भित्राउने नाममा बहुराष्ट्रिय कम्पनीलाई प्रवेश गराउने निर्णय गरेको छ ।
सरकारले कृषिक्षेत्रमा विदेशी लगानी भित्राउने निर्णय गर्दै त्यसका लागि आवश्यक कार्यविधि बनाउन थालेको आधिकारिक निर्णय सार्वजनिक भएसँगै अप्फाले यस्तो निर्णय गरेको हो ।
किसान महासङ्घ (अप्फा) का अध्यक्ष भैरवराज रेग्मीको हस्ताक्षरमा २०७७ पुस १७ गते जारी प्रेसविज्ञप्तिमा यस्तो धारणा सार्वजनिक भएको छ ।
कृषिमा विदेशी लगानी भित्रिँदा राष्ट्रिय अर्थतन्त्रको आधारभूत खम्बा मानिएका साना किसान र उद्यमीको बिचल्ली हुने तर्कका साथ अप्फाले सरकारको यस्तो निर्णयका विरुद्ध आवाज उठाउन सबै किसान सङ्घ–सङ्गठन र सरोकारवालासित अपिल गरेको हो ।
प्रेसविज्ञप्तिको पूर्ण पाठ यस्तो छ–
“हालै नेपाल सरकारले कृषिक्षेत्रमा वैज्ञानिक प्रविधि भित्राउने निर्णय गरेको छ । स्मरणीय छ, कृषिक्षेत्रमा विदेशी लगानी (बहुराष्ट्रिय कम्पनीको लगानी) को विरुद्ध किसान सङ्घ–सङ्गठनहरूले लामो समयदेखि सङ्घर्ष गर्दै आएका थिए । त्यसको परिणाम कृषिमा ‘प्रविधि हस्तान्तरण ऐन–२०७५’ मा स्पष्ट रूपमा विदेशी लगानी भित्राउन नपाइने कानुन नै निर्माण भएको थियो । यसभन्दा पहिले ओली सरकारद्वारा पटक–पटक कृषिमा विदेशी लगानी भित्राउने प्रयत्न भएको थियो । त्यसको विरुद्ध किसान सङ्घ–सङ्गठनहरूको दबाबपछि त्यसै रोकिएको थियो । अहिले आएर ओली सरकारले कृषिक्षेत्रमा विदेशी लगानी भित्राउने निर्णय गरेको छ; र, त्यसका लागि आवश्यक ऐन र कार्यविधि तयार गरिरहेको सार्वजनिक भएको छ ।
भारतलगायत विश्वभरि नै साना किसान र राष्ट्रिय कृषि व्यवसायीहरू बहुराष्ट्रिय कम्पनीबाट विस्थापित भइरहेको यो अवस्थामा साना किसान (कृषिउद्यमी–व्यवसायी) विस्थापित हुन पुग्छन् । यसबाट उनीहरू बेरोजगार त हुन्छन् नै, उनीहरूको जमिन वा परियोजना वा उत्पादनको स्वामित्व पनि समाप्त हुन्छ । यसरी विदेशी लगानी भित्राउने कानुनको विरुद्ध भारतका किसानको लामो समयदेखि गर्दै आएको सङ्घर्ष उदाहरणीय छ । अहिले पनि यसका विरुद्ध भारतका किसान आन्दोलनमा नै छन् ।
राष्ट्रिय अर्थतन्त्रको निर्माण र विकासका लागि माइक्रो इकोनोमिक एक्टिभिटी अर्थात् भूमिहीन, साना र मझौला किसान नै आधारभूत खम्बा मानिन्छन् । अब बहुराष्ट्रिय कम्पनी भित्रिएपछि किसानको बिचल्ली हुने र देशको अर्थतन्त्र साम्राज्यवादको लागि कानुनी रूपमा नै खुल्ला हुने छ । त्यसैले कृषिमा विदेशी लगानी कुनै हालतमा पनि भित्रिन दिनुहुन्न । यसको विरुद्ध व्यापक जनदबाब दिन सबै किसान सङ्घ–सङ्गठन र सरोकारवाला एक भई आवाज उठाउन अखिल नेपाल किसान महासङ्घ (अप्फा) अपिल गर्दछ ।”
