काठमाडौं । युरोपेली संघ (ईयू) सम्बद्ध राष्ट्रहरुमा कोरोना भाइरसबाट बच्न खोप दिन सुरु गरिएको छ । युरोपेली आयोगकी प्रमुख उर्जुला भोन डेर लेयनले फाइजर र बायोएनटेकले विकास गरेको खोप संघका २७ वटै सदस्य राष्ट्रमा वितरण गरिएको बताएकी बीबीसीले जनाएको छ ।

एक दिन पनि कुर्न नसक्ने भन्दै कतिपय राष्ट्रहरूले शनिवारबाटै खोप लगाउने काम सुरु गरेका थिए । युरोपेली संघमा हालसम्म तीन लाख ३५ हजार भन्दा बढीको कोभिड–१९ का कारण मृत्यु भइसकेको छ ।

१ करोड ४० लाख भन्दा धेरै मानिस संक्रमित भइसकेका छन् । लगभग सबैजसो सदस्य राष्ट्रमा कडा प्रतिबन्धात्मक व्यवस्था लागू गरिएको छ ।
कोरोनाभाइरसको अझ बढ्ता सङ्क्रामक प्रकार विभिन्न युरोपेली देशसहित क्यानडा अनि जापानमा समेत पुष्टि भएका बेला खोप लगाउन सुरु गरिएको हो । भाइरसको नयाँ प्रकार देखिएपछि गत साताबाट विश्वभर नयाँ यात्रा प्रतिबन्धहरू लागेका छन् ।

खोप कार्यक्रमको पछिल्लो अवस्था ?
युरोपेली संघ अन्तर्गतका राष्ट्रहरूमा खोप कार्यक्रम आइतवारबाट सुरु भएको हो । युरोपेली औषधि निकाय (ईएमए) र युरोपेली आयोगले जर्मन(अमेरिकी फाइजररबायोएनटेक खोपलाई स्वीकृति दिएसँगै खोप दिने कार्य सुरु गरिएको हो ।