काठमाडौं । देशभर पछिल्लो २४ घण्टामा थप ३ हजार ५१ जनामा कोरोना भाइरस (कोभिड –१९) को संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार पछिल्लो समय १३ हजार ६८ जनाको स्वास्थ्य परीक्षण गर्दा एक हजार २०९ महिला र एक हजार ८४२ पुरुष गरी उक्त संख्यामा संक्रमण पुष्टि भएको हो । योसँगै नेपालमा कोरोना भाइरस संक्रमितको संख्या १ लाख ८५ हजार ९७४ पुगेको छ ।
हाल देशभर सक्रिय संक्रमित ३६ हजार ५१४ जना रहेका छन् । मन्त्रालयका अनुसार पछिल्लो २४ घण्टामा निको हुनेको संख्या तीन हजार ४३० रहेको छ । योसँगै निको हुनेको संख्या एक लाख ४८ हजार ४०८ पुगेको छ । हाल देशभर एक हजार दुई सय ३२ जना क्वारेन्टिनमा रहेका छन् ।
ज्यान गुमाउनेको संख्या एक हजार ५२
हालसम्म कोरोनाबाट मृत्यु हुनेको संख्या एक हजार ५२ पुगेको छ भने पछिल्लो २४ घण्टामा थप १८ जनाले ज्यान गुमाएको मन्त्रालयले जनाएको छ ।
उपत्यकामा १ हजार ३९८ संक्रमित थप
पछिल्लो २४ घण्टामा काठमाडौँ उपत्यकामा १ हजार ३९८ जनामा कोरोना भाइरस संख्यामण पुष्टि भएको छ । मन्त्रालयका अनुसार काठमाडौंमा एक हजार ९१, ललितपुरमा १६० र भक्तपुरमा १४७ जनामा संक्रमण पुष्टि भएको हो ।
मन्त्रालयका अनुसार उपत्यकामध्ये काठमाडौंमा हालसम्म संक्रमितको संंख्या ६८ हजार ४४९ पुगेको छ भने निको हुनेको संख्या ५१ हजार ८५९ रहेको छ ।
भक्तपुरमा हालसम्म ६ हजार २३२ जनामा संक्रमण पुष्टि भएको छ भने निको हुने चार हजार ९१५ रहेका छन् । यस्तै ललितपुरमा कूल नौ हजार ६६३ संक्रमितमध्ये सात हजार ३२२ जना निको भएका छन् । हाल दुई जिल्ला मनाङ र बाजुरा बाहेकका ७५ वटै जिल्लामा सक्रिय संक्रमित रहेका छन् ।
