गिरीप्रसाद बुढामगर ।।
रुकुम पश्चिम । राप्ती साहित्य परिषद् जिल्ला शाखा रुकुम पश्चिमको आयोजनामा द्वैमासिक रूपमा सञ्चालन हुँदै आएको एकल रचना वाचन कार्यक्रमको पच्चिसौँ शृङ्खला यही २०७७ कार्तिक १५ गतेका दिन मुसिकोट नगरपालिका–५ बागबजारमा सम्पन्न भएको छ ।
प्रगतिशील लेखक सङ्घ कर्णाली प्रदेशका अध्यक्ष गिरीप्रसाद बुढाको प्रमुख आतिथ्यता रहेको कार्यक्रमका विशेष अतिथिहरूमा मुसिकोट बहुमुखी क्याम्पसका क्याम्पस प्रमुख मुकुण्दप्रसाद शर्मा, त्रिभुवन जनता माविका प्रअ हरिप्रसाद खनाल हुनुहुन्थ्यो । परिषद्का अध्यक्ष मनलाल ओलीको अध्यक्षतामा अघि बढेको सो कार्यक्रमको अन्य अतिथिहरूमा नेपाल शिक्षक सङ्गठनका केन्द्रीय उपाध्यक्ष नन्दराम देवकोटा, आहा सञ्चार साप्ताहिकका सम्पादक मेघराज खड्का, प्राइम टाइम टेलिभिजनका रिपोर्टर भरत चन्द, राप्ती साहित्य परिषद जिल्ला शाखा रुकुमका पूर्व सहसचिव समष्टि बुढालगायतका हुनुहुन्थ्यो ।
राष्ट्रिय गान तथा सहिदहरूको सम्झनामा एक मिनेट मौनधारणपछि अगाडि बढेको यस कार्क्रममा परिषद्का कोषाध्यक्ष प्रमोदकुमार शर्माले स्वागत मन्तव्य तथा साहित्यकार हरिप्रसाद खनालले स्रष्टा चिनारी गराउनुभएको थियो ।
रचना वाचन कार्यक्रमका रचना वाचक साहित्यकार वीरबहादुर केसी हुनुहुन्थ्यो । उहाँले विभिन्न शीर्षकका १९ वटा कविता वाचन गर्नु भएको थियो भने वाचित कविताको समीक्षा क्याम्पस प्रमुख तथा साहित्यकार मुकुण्दप्रसाद शर्माले गर्नुभएको थियो ।
परिषद्का सचिव साहित्यकार ओमबहादुर केसीको सञ्चालन रहेको यस कार्यक्रममा उपस्थित विभिन्न स्रष्टाहरूले बिचबिचमा आआफ्ना रचना सुनाउनुभएको थियो ।
