काठमाडौं । राष्ट्रिय जनमोर्चाले पार्टीका पुराना नेता दुर्गाबहादुर महर्जनप्रति श्रद्धाञ्जली अर्पण गरेको छ । शनिबार महर्जनकै निवास ललितपुर हरिसिद्धिमा श्रद्धाञ्जली सभाको आयोजना गरी उहाँप्रति सम्मान प्रकट गरिएको हो ।
महर्जनको फोटोमा नेपाल कम्युनिष्ट पार्टी (मसाल) का प्रवक्ता रामप्रकाश पुरीले माल्यार्पण गरी उहाँले पार्टी र मजदुर आन्दोलनप्रति पुर्याउनुभएको योगदानको चर्चा गर्नुभएको थियो ।
कार्यक्रममा राष्ट्रिय जनमोर्चाका नेता आनन्द शर्मा, अखिल नेपाल जनजाती सम्मेलनका अध्यक्ष निमबहादुर बुढा, अखिल नेपाल महिला संघका अध्यक्ष मिना पुन, राजमो बागमती प्रदेश सचिवालय सदस्य निलगोविन्द महर्जन, नेकपा केन्द्रीय सदस्य दिपेन्द्र श्रेष्ठ, ललितपुर महानगर २९ नं वडाका वडाअध्यक्ष गणेश कुमार महर्जन, प्रेरणा स्कुलका प्रिन्सिपल हिरा महर्जन, ब्राइटस्टार वर्कस इङलिस स्कूलका प्रिन्सिपल श्याम यादवलगायतले शोक मन्तव्य व्यक्त गर्नुभएको थियो ।
राजमो ललितपुरका अध्यक्ष दिपराम महर्जनको अध्यक्षतामा सम्पन्न भएको कार्यक्रमको सञ्चालन राजमो हरिसिद्धिका नेता विजयगोविन्द महर्जनले गर्नुभएको थियो ।
ललितपुरको हरिसिद्धि–८ का बासिन्दा महर्जनको ६३ वर्षको उमेरमा कात्तिक २ गते निधन भएको थियो । उहाँ लामो समयसम्म अखिल नेपाल ट्रेड युनियम महासंघ (अन्टुक) को नेतृत्वदायी भूमिकामा रहनुभएको थियो । हरिसिद्धी इँटा उद्योगमा भएको मजदुर आन्दोलनका नेता महर्जन करिब चार दशकदेखि नेकपा (मसाल)को राजनीतिमा सक्रिय रहनुभएको थियो ।
यो पनि : नेकपा (मसाल) का नेता दुर्गा महर्जनको निधन
