हेम बिजी

भरखर भरखर
जस्तै लाग्छ
आगो निभाएको समय पनि
जब
घर नै खरानी हुने गरी
दन दन आगो
सल्किरहेको थियो घरबाटै
हुर्किरहेको थियो बन्धुहरुबाटै
आखिर
हामी सबै बन्धुहरु मिल्यौं
र आगो निभायौं
गाग्रीका गाग्री पानी खनायौं
र प्रतिवद्धता गर्यौं
आगो नसल्काउने हामी अब
आगो नहुर्काउने हामी अब !

तर
आज फेरि
बिस्तारै बिस्तार आगो सल्किन
थाल्दै छ
धुवाँ निस्कदै छ
झिल्का देखिदै छ
फेरि
उहि ठाउँबाट
उहि रुपबाट !

प्रिय बन्धुहरु !
आगो निभाएकै समयमा
हामी
प्रतिवद्धता गरेका थियौं
अब
घर खरानी हुने गरि
आगो नसल्काउने सर्तमा
आगो नहुर्काउने सर्तमा
तर
आज अचम्मै लाग्दै छ
निभि सकेको आगो
फेरि आज
किन सल्काउन खोजिदै छ
किन दन्काउन खोजिदै छ !!