काठमाडौं । पर्सा जिल्लामा नेकपाका दुई समूहबीच बिहीबार भएको झडपमा परी मारिएका नेकपा विन्दवासनी गाउँपालिकाका सचिव मुकेश चौरसियाको हत्यामा संलग्नविरुद्ध कारबाहीको माग गर्दै प्रदर्शन भएकोे छ ।
जिल्ला प्रहरी कार्यालय पर्साअगाडि नेकपाका नेता तथा कार्यकर्ताले घटनामा संलग्नविरुद्ध जाहेरी दर्ताको माग गर्दै प्रदर्शन गरेका हुन् ।
प्रदर्शनका क्रममा नेपाल कम्युनिस्ट पार्टी (नेकपा) का नेता मातृका यादवले चौरसियाको घटनामा संलग्नलाई पर्सा प्रहरी बचाउनलाई हालसम्म जाहेरी दर्ता गर्नै नमानेको बताए । उनले दोषीलाई कारबाही नगरेसम्म आन्दोलन जारी रहने चेतावनी पनि दिए ।
पर्सा प्रहरीले घटनाबारे आवश्यक अनुसन्धान गर्न ढिलासुस्ती गरेको भन्दै मृतकका परिवारजनले लास बुझ्न मानेका छैनन्।
शपथग्रहण कार्यक्रममा असन्तुष्ट पक्षले आफूलाई सहभागी नगराएको भन्दै झडप गर्ने तीनजनालाई पर्सा प्रहरीले नियन्त्रणमा लिएको जनाएको छ । पक्राउ पर्ने हनिफ मियाँ, देवा सहनी र सोकदिन गदी रहेको पर्सा प्रहरीले जनाएको छ ।
बिहीबार पर्साको विन्दावासनी गाउँपालिका– ५ प्रसौनी भाठामा झडपमा परी घाइते भएका चौरसियाको उपचारको क्रममा शुक्रबार मृत्यु भएको हो । झडपमा आठजना घाइते भएको थिए । जसमा चारजना उपचार गरी घर फर्केका छन्। मुकेशको टाउकोमा गम्भीर चोट लागेको थियो । उपचारको क्रममा नै चौरसियाको वीरगन्जको एलएस न्युरो अस्पतालमा शुक्रबार बिहान मृत्यु भएको हो ।
यता प्रमुख प्रतिपक्ष नेपाली कांग्रेसले आफ्नै कार्यकर्ता हत्याको विषयमा पनि जाहेरी नलिने सरकारबाट के अपेक्षा गर्ने ? भन्दै सरकारसँग प्रश्न गरेको छ । कांग्रेसले शनिबार एक विज्ञप्ति प्रकाशित गरी घटनामा संलग्नविरुद्ध कारबाही गर्न प्रधानमन्त्री एवं नेकपा अध्यक्ष केपी शर्मा ओलीको ध्यानाकर्षण गराएको छ ।
‘नेकपाकै कार्यकर्ताको हत्याको जाहेरी समेत नबुझ्ने सरकारबाट कानूनी राज्यको कस्तो अपेक्षा राखौं ? पर्साबाट घटनामा प्रधानमन्त्री एवं नेकपाकै अध्यक्षको ध्यानाकर्षण गराउँदछौं’, प्रवक्ता विश्वप्रकाश शर्माद्वारा जारी विज्ञप्तिमा भनिएको छ।
कांग्रेसले घटना भएको तीनदिन बित्दासमेत प्रहरीले जाहेरी लिन अस्वीकार गरेका कारण अस्पतालबाट शव समेत नउठेको भन्दै घटनाको गहिरो छानबिन गर्न र दोषीलाई तत्काल पक्राउ गरि कानुनी कारबाही गर्न सरकारसँग माग गरेको छ।
