काठमाडौँ । भारतीय गुप्तचर संस्था ‘रअ’ का प्रमुख सामान्तकुमार गोयल काठमाडौँ आएका छन् । इन्डियन एयर फोर्सको विशेष चार्टर्ड विमानबाट गोयलसहित ‘‘रअ’ का उच्च अधिकारीहरू नेपाल आएको स्रोतले जानकारी दिएको छ ।
अबको केही दिनपछि भारतीय सेना प्रमुख मनोज मुकुन्द नरवाणे नेपाल भ्रमण गर्दैछन् । उनलाई नेपाली सेनाको ‘मानार्थ महाराथी’ बनाउने तयारी गरिएको छ ।
नेपालप्रति आक्रामक अभिव्यक्ति दिएका नरवाणेलाई महारथी पद दिन नहुने भन्दै जनस्तरबाट विरोध भइरहेका बेला ‘रअ’ प्रमुख पनि नेपाल आइपुगेका हुन् । सेनाध्यक्षको भ्रमण र दुई देशको सम्बन्ध सुधारमा उनको भ्रमण केन्द्रित हुने बताइएको छ ।
भारतले अतिक्रमण गरेका कालापानी, लिपुलेक, लिम्पियाधुरालगायत क्षेत्रलाई समेटेर नेपालले नयाँ नक्सा सार्वजनिक गरेपछि भारत नेपालप्रति थप आक्रामक हुँदै आएको छ । तर, पछिल्लो दिनमा सरकारले अतिक्रमित भूमि फिर्ताको विषयलाई छोड्दै गएको छ भने सो क्षेत्रबारे तयार पारेको पारेको पाठ्यपुस्तक नपढाउन निर्देशन नै दिएको थियो ।
यसलाई दुई देशबिच सम्बन्ध सुधारको प्रयासका रूपमा ब्याख्या गर्ने गरिएको छ । सरकारले भारतपरस्त नीति अपनाउँदै गएको बेला ‘रअ’ का प्रमुखको नेपाल भ्रमणलाई महत्त्वका साथ हेरिएको छ ।
