धनगढी । शनिबार रातिदेखि हराएका कैलालीको अस्थायी प्रहरी बिट, जुगेडामा कार्यरत प्रहरी जवान रामबहादुर साउदको शव मंगलबार बिहान भेटिएको छ । साउदको शव पनि गोविन्द विकको शव भेटिएको ठाउँ नजिकै भेटिएको हो ।
शनिबार राति मोटरसाइकल गस्तीमा गएका बेला प्रहरी बिटका इन्चार्ज असई विक र जवान रामबबहादुर साउद तस्कर समूहको निशानामा परेका थिए । विकको शव मोहना नदीमा भेटिएको थियो । साउदको शव गोविन्द विकको शव भेटिएको ठाउँको करिब २०० मिटर टाढा भेटिएको हो ।
असई विक र जवान साउद तस्कर समूहको सामूहिक आक्रमणमा परेको प्रहरीको अनुमान छ । घटनामा संलग्न भएको आशंकामा प्रहरीले १३ जनालाई नियन्त्रणमा लिएर अनुसन्धान गरिरहेको छ ।
शनिबार राति प्रहरी सहायक निरीक्षक विक र साउद सँगै गस्ती गर्न गएकामा राति अबेरसम्म पनि सम्पर्क हुन नसकेपछि खोजतलास गरिएको थियो । विकको धारिलो हतियार प्रहार गरी हत्या गरिएको अवस्थामा आइतबार मोहना नदीमा शव फेला परेको थियो ।
गस्तीमा जाँदा प्रयोग गरिएको मोटरसाइकल शव भेटिएको स्थानदेखि करीब दुई किलोमिटर पश्चिमतर्फ फेला परेको थियो । नदी पारि भारतीय क्षेत्रबाट अवैध रुपमा मालसामान भित्रिने गरेको छ । अवैध रुपमा सामान भित्र्याउने समूहले प्रहरीको हत्या गरेको हुन सक्ने बताइएको छ ।
असई विकको हत्या आशंकामा ११ जना गिरफ्तार, हवल्दार साउद अझै सम्पर्कविहीन
