धनगढी । कैलालीमा प्रहरीको हत्या गरेको आशंकामा ११ जना नियन्त्रणमा लिएर अनुसन्धान सुरु गरेको छ । शनिबार राति धनगढी उप-महानगरपालिका–१२ जुगेडामा रहेको अस्थायी प्रहरी पोस्टका प्रहरी सहायक निरीक्षक (असई) गोविन्द बिक मृत भेटिएका थिए ।
कैलालीको मोहना नदीको बीचमा आइतबार उनको शव भेटिएको हो। उनीसँगै गस्तीमा निस्केका अर्का प्रहरी जवान रामबहादुर साउद भने भने अझै बेपत्ता छन्।
सो घटनामा संलग्न रहेको आशंकामा अहिलेसम्म प्रहरीले ११ जनालाई पक्राउ गरी अनुसन्धान अगाडि बढाएको जनाएको छ । प्रदेश प्रहरी कार्यालयका प्रहरी वरिष्ठ उपरीक्षक मुकेश सिंहले घाँटीमा धारिलो हतियार प्रहार गरी हत्या गरेर शव नदीमा फालिएको अवस्थामा फेला परेको र अनुसन्धान सुरु गरिएको जानकारी दिनुभयो ।
गएराति गस्तीमा हिँडेका प्रहरी सहायक निरीक्षक विकको धारिलो हतियार प्रहार गरी हत्या गरिएको अवस्थामा मोहना नदीमा शव फेला परेको थियो । विकसँगै गस्तीमा हिँडेका सोही कार्यालयका प्रहरी हवल्दार रामबहादुर साउद पनि सम्पर्कविहीन छन् । गए राति प्रहरी सहायक निरीक्षक विक र हवल्दार साउदसँगै गस्ती गर्न गएकामा राति अबेरसम्म पनि सम्पर्क हुन नसकेपछि खोजतलास गरिएको थियो । सम्पर्कमा नरहेका हवल्दारको खोजी भइरहेको छ ।
नदी पारि भारतीय क्षेत्रबाट अवैध रुपमा मालसामान भित्रिने गरेको छ । अवैध रुपमा सामान भित्र्याउने समूहले प्रसनि विकको हत्या गरेको हुन सक्ने बताइएको छ । गस्तीमा जाँदा प्रयोग गरिएको मोटरसाइकल शव भेटिएको स्थानदेखि करीब दुई किलोमिटर पश्चिमतर्फ फेला परेको छ ।
मृतक विकको घरठेगाना कञ्चनपुर जिल्ला पुनर्वास नगरपालिकाका रहेको जनाइएको छ । प्रदेश प्रहरी कार्यालयका प्रमुख प्रहरी नायब महानिरीक्षक उत्तम सुवेदीको नेतृत्वको टोली आज बिहान घटनास्थल पुगेको थियो ।
