काठमाडौँ । सर्वोच्च अदालतले कोरोना सङ्क्रमितलाई लोकसेवा आयोगको परीक्षा दिनबाट वञ्चित नगराउन आदेश दिएको छ ।
बिहीबार न्यायाधीश सपना प्रधान मल्लको एकल इजलासले सङ्क्रमित व्यक्तिलाई परीक्षा दिनबाट बञ्चित नगराउन लोकसेवा आयोगलाई अन्तरिम आदेश दिएको हो ।
आयोगले जारी गरेको सङ्क्रमणको विशेष अवस्थामा परीक्षा (सञ्चालन तथा व्यवस्थापन) सम्बन्धी मापदण्डको बुँदा नम्बर ८ (१०) को कार्यान्वयन नगर्न नगराउन अदालतले भनेको छ । यो बुँदामा परीक्षार्थीले आफू कोभिड–१९ सङ्क्रमित भए नभएको स्वयम् घोषणा गर्नुपर्ने तथा सङ्क्रमित परीक्षार्थीले परीक्षा केन्द्रमा प्रवेश गर्न नपाउने व्यवस्था गरेको छ ।
सर्वोच्चले मुद्दाको अन्तिम टुङ्गो नलाग्दासम्म लोकसेवा आयोगका परीक्षार्थीले कोरोना सङ्क्रमणको स्वघोषणा गर्नुपर्ने र परीक्षामा सहभागी हुन नपाउने मापदण्ड कार्यान्वयन नगर्न भनेको छ ।
यस्तै परीक्षार्थी, परीक्षा लिने वा व्यवस्थापनमा संलग्न हुने सबैलाई सुरक्षित तरिकाले परीक्षा लिने र परीक्षा व्यवस्थापन गर्ने वातावरण बनाउन पनि सर्वोच्चले भनेको छ । साथै सङ्क्रमितहरुलाई गोपनीयता र आत्मसम्मानको संरक्षण गर्दै आवश्यक वैकल्पिक सुरक्षित व्यवस्थासहित परीक्षा सञ्चालन गर्न अन्तरिम आदेश दिएको छ ।
