काठमाडौं । अखिल नेपाल युवक संघले अनुशासन उल्लंघन गर्ने पाँच नेताविरुद्ध कारबाही गरेको छ । मंगलबार अध्यक्ष अनिलकिशोर घिमिरेको अध्यक्षतामा बसेको भर्चुअल बैठकले संगठनको हित विपरित कार्य गरेको भन्दै उनीहरुमाथि कारबाही गरेको हो ।
युवक संघले केन्द्रीय सदस्य आशिष जवेगु र वैकल्पिक केन्द्रीय सदस्य शिव फुयाल र बालकृष्ण सुवेदी तथा राष्ट्रिय परिषद सदस्य चक्रबहादुर शाही (रोयल शमर)लाई संगठनबाट निष्काशन गरेको जनाएको छ । यस्तै, केन्द्रीय सल्लाहकार जितामित्र सुनार र बालकृष्ण सुबेदीलाई सल्लाहकारबाट निलम्बन गरिएको छ।
यस्तै, बैठकले सचिव भक्तबहादुर विकलाई बहु जिम्मेवारीका कारण सचिव पदबाट दिनुभएको राजीनामा स्वीकृत गरी सल्लाहकार बनाउने निर्णय पनि गरेको छ ।
युवक संघले संगठन विस्तारका लागि पनि विभिन्न निर्णय गरेको जनाएको छ । संगठनका महासचिव कृष्ण पाण्डेले दिनुभएको जानकारी अनुसार तल्लो तहसम्म संगठन निर्माण गर्नेगरी बैठकले योजना बनाएको छ । त्यस्तै, समसामयिक विषयमा प्रदेश र जिल्लाहरुमा अन्तर्क्रिया कार्यक्रम गरिनेछ । अन्तर्क्रियाको मिति र विषय सम्बन्धित प्रदेश र जिल्ला समितिहरुले छनौट गर्नेछन् ।
अखिल नेपाल युवक संघ अनुशासित र मिलिटेन्ट संगठन हो । नेकपा (मसाल) को सहायक संगठनको रुपमा रहेको युवक संघले राष्ट्रियता र जनतन्त्रको आन्दोलनसँगै युवाहरुलाई सचेत एवं संगठित बनाउन महत्वपूर्ण भूमिका निर्वाह गर्दै आएको छ ।
(*यसअघि समाचारमा केन्द्रीय सल्लाहकार जितामित्र सुनार र बालकृष्ण सुबेदीलाई संगठनबाट ‘निष्काशन’ गरिएको भन्ने शब्द भुलबस पर्न गएकोमा हामी क्षमाप्रार्थी छौं– सम्पादक)
युवक संघको वक्तव्य यहाँ हेर्नुहोस् ।
मंसिर र पुष महिनाभर देशब्यापी भेला-प्रशिक्षण सञ्चालन गर्ने युवक संघको तयारी
