झनक केसी, अर्घाखाँची ।
शीतगंगा नगरपालिका वडा नम्बर १२ का पहिरो पीडितहरुका लागि राहत सहयोग गर्नेहरु बढ्दै गइरहेका छन् । पहिरोबाट विस्थापितहरुलाई देश विदेशका विभिन्न संघसंस्थाहरुबाट सहयोग जुटेको छ ।

गत असोज ९ गते जोख्लेगैरा मैदान गाउँ भाँसिएर २६ घर पूर्ण रुपमा क्षति भएका थिए भने अन्य ३५ घर परिवार बिस्थापित भएका थिए ।वर्षाका कारण वडा नम्बर १२ र ११ मा ठुलो क्षति पुराएको छ भने गाँउ भासिँदै गएको छ ।

वडा नम्बर १२ का पीडितहरुलाई शीतगंगा सेवा समाजले ४५ हजार नगद सहयोग गरेको छ । जसमा संस्थाको तर्फबाट ४० हजार र संस्थाका आर्थिक सल्लाहकार अर्जुन भुसालले व्यक्तिगत पाँच हजार रुपैयाँ गरी जम्मा ४५ हजार सहयोग गरेको हो ।

शनिबार संस्थाका सचिव सुन्दर आचार्य, संयोजक झनक केसी, घनश्याम पराजुली लगायतको समूहले पीडितहरुको घर निर्माणको लागि वडा अध्यक्षलाई उक्त रकम हस्तान्तरण गर्नुभएको हो । साथै शीतगंगा सेवा समाजले आगामी दिनमा समेत सहयोगी हात अगाडि बढाउने सचिव आर्चायले बताउनु भएको छ ।

पहिरोमा परेपछि संस्थाका सदस्यहरु उद्धारमा समेत निरन्तर खटिरहेकोले पीडितहरुको साथमा शीतगंगा सेवा समाज सधैँ तयार रहेको आवश्यक परे नमुना बस्ती बनाउन विभिन्न संघ संस्थालाई आग्रह गरी अभियान नै सञ्चालन गरेरै भए पनि सहयोग गर्ने संयोजक झनक केसीले बताउनु भयो ।

काठमाडौंमा बसोबास गर्ने अर्घाखाँचीका विभिन्न संस्थामा आवद्ध समेत रहेर सामाजिक अभियान्ताहरुले समेत नगद सहयोग गरेका छन् । शीतगंगाका स्थानीय बासिन्दा समेत रहेका शालिकराम अधिकारीले सामाजिक सञ्जालमै अभियान सञ्चालन गरि यस अघि समेत पीडितहरुलाई लत्ताकपडा, टेन्ट, त्रिपाललगायतका सामग्री सहयोग गर्नु भएको थियो ।

अहिले पुनः शालिकराम अधिकारी, सचिन पाण्डे र शिवदेव पाण्डेको पहलमा सहयोग संकलन गरि नगर प्रमुख सूर्यप्रसाद अधिकारी तथा उपप्रमुख टीका रेस्मी, वडा अध्यक्ष बाबुराम गैरेलाई वडा नम्बर १२ को लागि ६५ हजार ५ सयको चेक हस्तान्तरण गर्नु भएको छ । यस्तै, वडा नम्बर ११ मा पनि ३५ हजार बराबरको कपडा र खाद्यान्न सहयोग गरेको अभियन्ता पान्डे र अधिकारीले जानाकारी दिनु भएको छ ।

यसैगरी जेसिआई सिद्धार्थ लेडी समूहले तथा लायन्स क्लव अफ सिद्धार्थ नगर लोटस मार्फत आएको राहत वडा नं. १२ मा गिता गैरे बन्जाडे र तुलसा भुसालले वडा अध्यक्ष बाबुराम गैरे मार्फत नगद ३० हजार र अन्य खाद्यान्न सामाग्री सहयोग गर्नुभएको छ । त्यस्तै साउदीबाट अर्जुन घिमिरेले पठाएको व्यक्तिगत सहयोग ५ हजार समेत हस्तान्तरण गरिएको छ ।

सहयोग हस्तान्तरणका लागि आयोजित कार्यक्रममा नगरपालिका प्रमुख अधिकारी तथा उपप्रमुख रेस्मीले स्थायी बसोवासको लागि उचित स्थानको खोजी भइरहेको बताउनुभयो । कार्यक्रमको सञ्चालन तेजेन्द्र पाण्डेले गर्नु भएको थियो ।

अभियन्ताहरुले शीतगंगा जोख्लेगैरामा खुल्ला आकाशमुनि बसिरहेका पीडितहरुलाई एकीकृत बसोबास गर्नेगरी छिटो भन्दा छिटो ब्यवस्थापन गर्न आग्रह गरेका छन् ।

शीतगंगाका पहिरोपीडितलाई राहत हस्तान्तरण