प्रकाश थापा मगर,काठमाडौँ । राष्ट्रिय जनमोर्चा ३ नं. प्रदेश समितिको आयोजनमा काठमाडौँमा सभा सम्पन्न भएको छ । राजमाेले देशका पाँचवटा प्रदेशमा एकैपटक अायाेजना गरेकाे सभा अन्तर्रगत शुक्रबार शान्तिवाटिकामा सो सभा सम्पन्न भएको हो ।
सभालाई सम्बोधन गर्दै प्रमुख अतिथि राजमोका कार्यकारी अध्यक्ष रश्मिराज नेपालीले राष्ट्रियता, गणतन्त्र र धर्म निरपेक्षतामाथि अहिले पनि खतरा रहिरहेको बताउनुभयो । “सरकारमा बसेकाहरूकै गतिविधिका कारण राष्ट्रियता, गणतन्त्र र धर्म निरपेक्षतामाथि खतरा आइलागेको हो” उहाँले अगाडि भन्नुभयो– “राष्ट्रिय जनमोर्चाले जनतालाई यसबारे सुसूचित गर्नका लागि यसखालको कार्यक्रम गर्नुपरेको हो ।” उहाँले अहिले पनि सीमा अतिक्रमण भइरहेको, कालापानीमा भारतीय फौज बसिरहेको, नेपाली नदीनालाका जलश्रोतमा भारतको हालीमुहाली कायमै रहेको, भ्रष्टाचारलाई सरकारले नै प्रश्रय दिइरहेको तथा धर्म निरपेक्षतामाथि सरकारकै भूमिकाले अप्ठ्यारो परिरहेको बताउनुभयो ।
कार्यक्रममा सम्बोधन गर्दै विशिष्ट अतिथि नेकपा (मसाल) का प्रवक्ता रामप्रकाश पुरीले नेपालमा कम्युनिस्ट नामको दुईतिहाइ बहुमतयुक्त सरकार हुनु, प्रतिक्रियावादीले उनीहरूलाई कम्युनिस्ट नै मान्नु तर उनीहरू कम्युनिस्ट नभएकाले जनतामा भ्रम परिरहेको बताउनुभयो । “यो सरकारले गरेका कमजोरीलाई नेपाली जनताले कम्युनिस्टकै कमजोरी ठान्ने गरेका छन्” प्रवक्ता पुरीले भन्नुभयो– “जनतालाई यो वास्तविकता बुझाउन पनि यसखालको कार्यक्रम आवश्यक भएको छ ।”
अखिल नेपाल महिला सङ्घकी केन्द्रीय अध्यक्ष मीना पुनले कार्यक्रममा सम्बोधन गर्दै गणतन्त्र र धर्म निरपेक्षताबारे यति छिट्टै किन प्रश्न उठ्यो भन्ने प्रश्न गर्दै यो चिन्ताको विषय भएको बताउनु भयो ।
राजमोका केन्द्रीय सदस्य घनश्याम न्यौपानेको सञ्चालन तथा केन्द्रीय सदस्य तथा राजमो ३ नं. प्रदेशका अध्यक्ष लालबहादुर थापाको अध्यक्षतामा सो कार्यक्रम सम्पन्न भएको थियो । राजमो भक्तपुरका अध्यक्ष शिवहरि खनालको स्वागत मन्तव्यका साथ अघि बढेको उक्त कार्यक्रममा राजमोकी केन्द्रीय सदस्यहरू लक्ष्मी केसी, कल्याणी श्रेष्ठ, अखिल नेपाल जनजाति सम्मेलनका अध्यक्ष निमबहादुर बुढाथोकी, अखिल नेपाल टे«ड युनियन महासङ्घ (अन्टुक) का अध्यक्ष नारायण सापकोटा, अखिल नेपाल कानुन व्यवसायी सङ्घका अध्यक्ष पदम रोका, राजमो नेता आनन्द शर्मा, राजमो सिन्धुपाल्चोकका अध्यक्ष दीर्घबहादुर सुवेदी र राजमो काठमाडौँका अध्यक्ष झविन्द्र बेलबासेको समेत आतिथ्यता रहेको थियो ।
कार्यक्रममा रक्तिमका कलाकारहरूले नृत्य प्रस्तुत गर्नुभएको थियो ।
