खिमबहादुर विक

पहराको कन्दरामा उम्रने बिरुवा हो तिमी
चट्टान चिर्दै हुर्कने आँकुरा हौ तिमी
ब्याकुल पन्छीको सहारा बन्ने डाली हौ तिमी
अँध्यारा बस्तीका जुनकिरी हौ तिमी
दबिएको आवाज बुलन्द पार्ने हिम्मत हौ तिमी
कुचल्न खोज्नेलाई पन्छाउने औजार हौ तिमी
अग्रसरतालाई गन्तव्यमा पुराउने माध्यम हौ तिमी
सच्चाइ देख्न नसक्नेलाई चस्मा हौ तिमी
पीत र झुटलाई प्रतिकार गर्दै अग्रसर हौ तिमी

भोका र नाङ्गाका आवाज हौ तिमी
निमुखा र ज्यामीका प्यास हौ तिमी
आधीहुरीका सामु पर्खाल हौ तिमी
झरीबादलका बेला ओत हौ तिमी
जालीफटाह विरुद्ध गर्जन हौ तिमी
भ्रष्ट, बेइमानका लागि तरबार हौ तिमी
राष्ट्र र राष्ट्रियताका सिपाही हौ तिमी
विखण्डन र विस्तारवाद विरुद्ध तोप हौ तिमी
बिचौलिया र साम्राज्यवाद विरुद्ध मिसाइल हौ तिमी

त्यसैले त
तिमीमाथि चौतर्फी हमला हुन सक्छ
घेरामा पार्ने कुचेष्टा हुन सक्छ
दुस्मनका ब्वाँसाका गिद्देदृश्य पर्न सक्छ
तर तिमी जुनसरी, नदीको बेगसरी
हिमालको कन्चन हावासरी
निरन्तर आफ्नो गन्तव्यमा पुग्ने छौ
किनकि
तिमी स्वयम् र तिम्रो साथमा
विशाल र सुन्दर विचार छ
युगदर्शन तिमीलाई शुभकामना !