काठमाडौं । भारतमा पतिले धारिलो हतियारले पेट चिरिदिएकी एक गर्भवतीले मृत बच्चा जन्माएको प्रहरीले जनाएको छ । घटना उत्तर प्रदेशको बदायूँ जिल्लाको हो।
महिलाको माइती पक्षले शिशुको लिङ्ग पहिचान गर्न उनलाई आक्रमण गरिएको आरोप लगाएको छ । तर, पक्राउ परेका ती पुरुषले भने आफूले जानीजानी त्यस्तो नगरेको दाबी गरेका छन् ।
ती दम्पतीका पाँच जना छोरी रहेका र ती पुरुषले छोरा जन्माउन पत्नीलाई दबाव दिने गरेको उनीहरूले बताएका छन् ।
पेट चिरिएकी महिलालाई राजधानी दिल्लीस्थित अस्पतालमा राखिएको छ र उनको स्वास्थ्य अवस्था स्थिर छ । उनका भाइका अनुसार स्वास्थ्य अवस्था निकै गम्भीर भएपछि चिकित्सकहरूको सल्लाहमा उनलाई दिल्ली पुर्याइएको थियो।
स्थानीय सञ्चारमाध्यमलाई ती पुरुषले धारिलो हतियार प्रहार गरेको तर त्यसले उनलाई गम्भीर चोट लाग्न सक्छ भन्ने कुरा भने नचिताएको बताएका छन्।
छोराले भविष्यमा आर्थिक रूपमा परिवारलाई सघाउने, बुढेसकालमा अभिभावकलाई हेर्ने र वंश अघि बढ्ने विश्वासका कारण धेरैले छोरा नै चाहने र यसले गर्भपतनलाई प्रोत्सान गर्ने गरेको बीबीसीले जनाएको छ । अर्कोतर्फ छोरी विवाह गरेर अर्काको घर जाने र अभिभावकहरूले दाइजोस्वरूप ठूलो धनराशि खर्च गर्नुपर्ने हुँदा समस्या बढेको बताइन्छ ।
