काठमाडौं । राष्ट्रिय जनमोर्चाले प्युठानको ओखरकोटस्थित कोटको चोरी भएको ‘निशान छाप’ खोजी गर्न माग गरेको छ ।
राजमो उपाध्यक्ष एवं प्युठानबाट निर्वाचित सांसद दुर्गा पौडेलले सोमबार प्रेशित गर्नुभएको वक्तव्यमा ऐतिहासिक महत्वको निशाना छाप चोरिएको करिब ३/४ वर्ष भइसक्दा पनि त्यसको खोजी नगरिएकोप्रति असन्तोष व्यक्त गर्नुभएको छ ।
वक्तव्यमा भनिएको छ, ‘प्यूठानको झिमरुक गाउँपालिका ओखरकोटको कोटको ऐतिहासिक महत्वको निशाना छाप चोरिएको करिब ३/४ वर्ष भइसक्यो । त्यो निशाना छाप मध्ययुगीन जाट राजाको अवशेष थियो र त्यो कोटका पुजारीको जिम्मा रहँदै आएको थियो । निशाना छापको चोरी भएपछि त्यसबारे छानविन गर्न सरकारी डोर जाँदा पुजारीले आत्महत्या गरेका थिए । त्यसपछि त्यस सम्बन्धि छानबिन अगाडि बढेन । बारम्बार ताकेता गर्दा पनि स्थानीय प्रशासन र सरकारले समेत त्यो चोरिएको ऐतिहासिक महत्वको सामग्री पत्ता लगाउन कुनै कारवाही अगाडि बढाएको छैन । त्यो विषयलाई गम्भिरतापूर्वक लिन हामीले केन्द्रीय सरकार, जिल्ला प्रशासन र स्थानीय निकाय समेतसित अनुरोध गर्दछौँ ।’
यस्तै वक्तव्यमा नेपालबाट विभिन्न समयमा चोरिएर विदेश लगिएका र पत्ता लागेका मूर्तिहरु पनि फर्काउन सरकारले प्रभावशाली कदम नचालेको उल्लेख छ । देशका कयौं मठमन्दिरका मुर्ति एवं पुरातात्विक सामग्रीहरु चोरी भएका वा हराएका घटनाप्रति राजमोले सरकार र स्थानीय प्रशासन वा स्थानीय निकायहरुको ध्यान आकर्षित गराएको छ ।
पुरै वक्तव्य यहाँ पढ्नुहोस्ः राजमोको प्रश्नः महत्वपूर्ण योगदान दिएका कुलमानलाई पुनःनियुक्त किन नगर्ने ?
