काठमाडौं । राष्ट्रिय जनमोर्चाले सरकारले विवादास्पद, भ्रष्ट र असक्षम व्यक्तिहरुलाई महत्वपूर्ण पदमा नियुक्त गरिरहेको भन्दै आपत्ति जनाएको छ ।

सोमबार वक्तव्य प्रकाशित गरी राजमो उपाध्यक्ष दुर्गा पौडेलले निष्कलंक र स्वच्छ छवि भएका र आफ्नो कार्यकालमा विद्युतको क्षेत्रमा महत्वपूर्ण योगदान दिएका कुलमान घिसिङ्गलाई सरकारले विद्युत् प्राधिकरणमा किन पुनर्नियुक्ति नगरेको भन्दै प्रश्न पनि गर्नुभएको छ ।

यस्तै, राजमोले सप्तरीमा न्याय नपाएर बलात्कृत एक किशोरीले गरेको आत्महत्याको घटनाबारे छानबिन गर्न माग गरेको छ । उपाध्यक्ष पौडेलले वक्तव्यमा एक हजार रुपैयाँ घुस प्रकरणमा एकजना कर्मचारीले आत्महत्या गरेको र पछि निर्दोष सावित भएको विषयमा पनि सरकारको ध्यानाकर्षण गराउँदै उनको परिवारको लालनपालनको व्यवस्था गर्न माग गर्नुभएको छ ।

यस्तो छ, वक्तव्य
१. आफ्नो कार्यकालमा विद्युतको क्षेत्रमा महत्वपूर्ण योगदान दिएका कुलमान घिसिङ्गलाई पुनः नियुक्ति नगर्ने सरकारको कार्यशैलीको राष्ट्रिय जनमोर्चाले आलोचना र विरोध गर्दछ । कतिपय भ्रष्ट, विवादास्पद र असक्षम व्यक्तिहरुलाई सरकारले उच्च तहमा भर्ती वा पदोन्नति गर्ने काम गरिरहेको छ । तर निष्कलंक र स्वच्छ छवि भएका र आफ्नो कार्यकालमा विद्युतको क्षेत्रमा महत्वपूर्ण योगदान दिएका कुलमान घिसिङ्गलाई पञ्छाउने नीतिबाट सम्पूर्ण प्रशासनयन्त्रको कार्यकुशलता र सुशासनमाथि नै नकरात्मक असर पर्ने कुरा प्रष्ट छ । सरकारको कार्यशैलीबाट जुन प्रकारको प्रशासनयन्त्रको निर्माण भैरहेको छ वा हुनेछ, त्यसबाट देशमा कुशल र सक्षम प्रशासनयन्त्रको निर्माण हुन नसक्ने कुरा प्रष्ट छ । आज देशका सबै जनपक्ष वा विकास कार्यक्रमहरुमा गम्भीर समस्या र अवरोध पैदा भएको छ त्यसका पछाडि सरकारको त्यस प्रकारको प्रशासन सम्बन्धि गलत कार्यशैली जिम्मेवार छ ।

२. सप्तरीमा बलात्कृत १७ बर्षीया युवतीलाई गाउँको समाजले प्रहरीमा जान रोकेकाले ती युवतीले आत्महत्या गरेको र सप्तरीमा नै गर्भवती महिलालाई कुटपिट गर्दा गर्भ तुहेको घटनालाई पनि गाउँमा दबाउन खोजिएको र सिराहको नवराजपुर गाउँपालिका वडा नम्बर ५ मा एक जना महिलालाई बोक्सी बकाउनको लागि गाउँको पञ्चायतले रातभर मन्दिरमा लगेर कुटपिट गरी मलमूत्र खुवाइएको घटनाहरुप्रति हाम्रो ध्यान आकर्षित भएको छ । महिलाहरुमाथि हिंसाका यी अत्यन्त गम्भीर घटनाहरु हुन् । ती घटनाहरुप्रति न्यायोचित छानविन गरेर दोषीलाई अपराध अनुसार दण्डसजाय गर्नुपर्ने आवश्यकतामा हामीले विशेष जोड दिन्छौँ ।

३. एक हजार रुपैया घुस खाएको आरोपमा एक जना कर्मचारीलाई अख्तियारले गिरफ्तार गरी मुद्दा चलाएको, अदालतले उनलाई सफाई दिएको र सफाई पाउनु भन्दा पहिले नै उनले आत्महत्या गरेको घटनाप्रति हाम्रो पार्टीको ध्यान आकर्षित भएको छ । निर्दाेष व्यक्तिको आत्महत्यापछि उनको परिवार असहाय भएको छ । आत्महत्या गर्ने व्यक्तिको परिवारलाई क्षतिपूर्ति र परिवारका व्यक्तिहरुको लालनपालन गर्न र रोजगारी दिनसमेत हामीले सरकारसित माग गर्दछौँ ।

४. सञ्चारमाध्यमहरुले नेपालबाट विभिन्न समयमा चोरिएर विदेश लगिएका र पत्ता लागेका मूर्तिहरु पनि फर्काउन सरकारले प्रभावशाली प्रकारको प्रशासनिक कदम उठाउन नसकेका समाचाहरु प्रकाशित भएका छन् । त्यसबारे शीघ्र ध्यान दिनका लागि हामीले सरकारसित माग गर्दछौँ । त्यसका साथै एउटा अर्काे पक्षप्रति पनि हामीले सरकार र जनता समेतको ध्यान आकर्षित गर्न चाहान्छाँै । देशका दूरवर्ती र ग्रामीण क्षेत्रका मन्दिरहरुमा रहेका कैयौँ पुरातात्विक वा ऐतिहासिक महत्वका सामग्रीहरुको पनि चोरी हुने गरको छ । त्यसप्रति पनि हामीले सरकार र स्थानीय प्रशासन वा स्थानीय निकायहरुको पनि ध्यान आकर्षित गर्न चाहान्छौँ ।

५. प्यूठानको झिमरुक गाउँपालिका ओखरकोटको कोटको ऐतिहासिक महत्वको निशाना छाप चोरिएको करिब ३÷४ वर्ष भइसक्यो । त्यो निशाना छाप मध्ययुगीन जाट राजाको अवशेष थियो र त्यो कोटका पुजारीको जिम्मा रहँदै आएको थियो । निशाना छापको चोरी भएपछि त्यसबारे छानविन गर्न सरकारी डोर जाँदा पुजारीले आत्महत्या गरेका थिए । त्यसपछि त्यस सम्बन्धि छानबिन अगाडि बढेन । बारम्बार ताकेता गर्दा पनि स्थानीय प्रशासन र सरकारले समेत त्यो चोरिएको ऐतिहासिक महत्वको सामाग्री पत्ता लगाउन कुनै कारवाही अगाडि बढाएको छैन । त्यो विषयलाई गम्भिरतापूर्वक लिन हामीले केन्द्रीय सरकार, जिल्ला प्रशासन र स्थानीय निकाय समेतसित अनुरोध गर्दछौँ ।

६. देशका विभिन्न कारागारहरुमा कैदीहरु झन पछि झन ठूलो संख्यामा कोभिड– १९ बाट संक्रमित भएका समामचारहरु लगातार आइरहेका छन् । त्यसरी संक्रमित हुँदा पनि उनीहरुलाई क्वारेन्टाइन वा आइसोलेसनमा राख्ने तथा उपचार गर्ने समेतबारे पर्याप्त व्यवस्था हुन नसकेका समाचारहरुले जेलहरुको चिन्ताजनक र गम्भीर अवस्थालाई बताउँछ । त्यसप्रति समयमा नै ध्यान दिन हामीले सरकारसित माग गर्दछौँ ।

७. सरकारले सिन्धुपाल्चोक र बाग्लुङमासमेत जोखिमपूर्ण बस्तीहरुको स्थानान्तरणको लागि ध्यान नदिएकोले बाढी पहिरोबाट ठूलो धनजनको क्षति भएका घटनाहरुप्रति हामीले बारम्बार सरकारको ध्यान आकर्षित गर्दै आएका छौँ । अब जुम्लामा समेत त्यसप्रकारका जोखिमपूर्ण बस्तीहरुमा बाढी पहिरोको खतरा भएको र प्रदेश सरकारले समेत त्यस्ता बस्तीहरुको स्थानान्तरणका लागि सरकारसित माग गरेका समाचारहरु आएका छन् । जोखिमपूर्ण बस्तीहरुको स्थानान्तरण एउटा राष्ट्रिय स्तरको नै गम्भीर समस्या हो । त्यसकारण सरकारले देशव्यापी रुपमा नै आवश्यक भूगर्भिय सर्वेक्षण गरेर सबै जोखिमपूर्ण बस्तीहरुको स्थानान्तरणका लागि विस्तृत योजना बनाएर काम गर्नुपर्ने आवश्यकतामा हाम्रो पार्टीले विशेष जोड दिन्छ ।

८. जोगवनीबाट जनकपुरसम्म रेल आएको कार्यको लागि हामीले प्रसन्नता प्रकट गर्दछौँ । तर त्यससित जोडिएको एउटा अर्काे पक्षप्रति पनि हाम्रो ध्यान जानुपर्ने आवश्यकता छ । सार्वजनिक क्षेत्रमा सुरु गरिएका कैयौँ कार्यक्रमहरु केही समय पछि नै भ्रष्टचार वा अक्षमताका कारणले असफल हुने गरेका छन् । जस्तै कि रकसौल, अमलेखगञ्ज र जोगवनी जनकपुर रेल सेवा, काठमाण्डौँ भक्तपुर ट्रली सेवा, सार्वजनिक क्षेत्रमा संचालित चिनी, छाला, कृषि औजार, कागज आदिका कैयौँ उद्योगहरु खत्तम भएका छन् । त्यही प्रकारले अहिलेको जोगवनी जनकपुर रेल सेवा पनि असफल हुन नपाओस र त्यसका लागि हामीले सरकारलाई समयमा नै सतर्क गराउन चाहान्छौँ ।