बागलुङ । यही भदौ १७ गते राति भुजीखोलामा आएको बाढीले उजाड ढोरपाटन नगरपालिकाको बोबाङ क्षेत्रमा ब्यापक क्षति गर्यो ।
बाढीले सबैभन्दा बढी वडा नं. ९ मा क्षति पु-याएको छ । बाढीमा परी १६ जनाको मृत्यु भएको छ भने २२ जना अझै बेपत्ता छन् ।

बाढीबाट ८० घरमा पूर्ण र ५१ घरमा आशिंक क्षति पुगेको छ । एउटा स्वास्थ्य चौकी भवन, दुई विद्यालय, ११ वटा झोलुङ्गे, पाँच वटा ढलान र दश वटा काठे पुलमा क्षति पुगेको जनाइएको छ । सो क्षेत्रका ११ लघुजलविद्युत् आयोजनामा क्षति पुगेपछि ढोरपाटन नगरपालिकाको बाढीग्रस्त क्षेत्रमा विद्युत् र सञ्चार सेवा विच्छेद भएको छ ।

मोबाइल टावरमा विद्युत् आपूर्ति रोकिँदा सञ्चार अबरुद्ध भएको छ । सञ्चार सेवा विच्छेद हुँदा बेलैमा जानकारी लिनदिन र समन्वयमा कठिनाइको स्थिति छ । उद्धारकर्ता र सहयताकर्मीसँग पनि सम्पर्क स्थापित हुन सकेको छैन । विपद्स्थलमा नपुगेसम्म बाढी प्रभावितका भोगाइ र पीडा बाहिर आउन सकेका छैनन् । लघुजलविद्युत् आयोजनामा क्षति पुग्दा वडा नं। १, २, ५, ६, ७, ८ र ९ वडा अन्धकारमय बनेको नगर उपप्रमुख करमती पुनले बताउनुभयो ।

यस्तै, बाढीले बुर्तिबाङ–ढोरपाटन सडक ठाउँठाउँमा क्षतविक्षत पारेको छ । सडक अबरुद्ध हुँदा बाढी प्रभावितलाई राहत सामग्री पु-याउनसमेत कठिनाइ भइरहेको छ । अहिले त्यस क्षेत्रमा पुग्न दोगाडीबाट झण्डै तीन घण्टा पैदल हिँड्नुपर्छ ।

एकीकृत घर बनाउँछौँः मुख्यमन्त्री गुरुङ
यसैबीच बाढी प्रभावित बोबाङ गाउँको गण्डकी प्रदेश सरकारका मुख्यमन्त्री पृथ्वीसुब्बा गुरुङले स्थलगत निरीक्षण गर्नुभएको छ । राहत सामग्रीसहित बाढीग्रस्त क्षेत्र ढोरपाटन नगरपालिका–९ बोबाङ पुग्नुभएका मुख्यमन्त्री गुरुङले बाढी पीडितका साथमा प्रदेश सरकार रहेको बताउँदै घरविहीनहरुलाई एकीकृत बस्ती निर्माण गर्ने गरी प्रदेश सरकार अगाडि बढ्ने बताउनुभयो ।

गुरुङले नगरपालिकाले जग्गा व्यवस्थापन गरे सङ्घ र प्रदेश मिलेर एकीकृत बस्ती बसाल्ने प्रतिबद्धता व्यक्त गर्नुभयो । उहाँले क्षति पुगेको विद्यालय, जलविद्युत् आयोजना, स्वास्थ्य एकाइ तथा सडक निर्माणमा जिल्लामा हालै स्थापना गरेको पूर्वाधार विकास कार्यालयलाई जिम्मा दिने बताउनुभएको छ । गुरुङसहित आन्तरिक मामिला तथा कानूनमन्त्री हरिबहादुर चुमान, बागलुङबाट निर्वाचित गण्डकी प्रदेशका सांसद इन्द्रलाल सापकोटा, चन्द्रबहादुर बुढा, खिमविक्रम शाहीलगायत बाढीग्रस्त क्षेत्रमा पुग्नुभएको थियो ।

अत्यावश्यक राहत सामग्रीसहित सनाखत भएका मृतकका १३ परिवारलाई प्रतिपरिवार ५० हजार नगदका दरले राहतसमेत प्रदान गर्नुभएको मुख्यमन्त्रीका प्रेस संयोजक विक्रम न्यौपानेले जानकारी दिनुभयो । न्यौपानेका अनुसार हेलिकप्टरमार्फत बाढीग्रस्त क्षेत्रमा पुग्नुभएका मुख्यमन्त्री गुरुङले ४० परिवारलाई भाँडाकुँडा, टेन्ट, म्याटेस्ट सहितका अत्यावश्यक राहत सामग्री हस्तान्तरण गर्नुभएको थियो ।

जुट्न थाल्यो राहत
बाढी पीडितहरुका लागि राष्ट्रिय जनमोर्चा केन्द्रीय कार्यालयको तर्फबाट दुई लाख रुपैयाँ सहयोग उपलब्ध गराइएको छ । अन्य विभिन्न संघ संस्था तथा व्यक्तिहरुबाट पनि सहयोग संकलन भइरहेको उपप्रमुख पुनले बताउनुभयो ।

ढोरपाटन नगरपालिकाकी उपप्रमुख करमती पुनले अहिलेसम्म रु दुई लाख ३० हजार बराबरको राहत सामग्री प्राप्त भएको जानकारी दिनुभयो । नेपाल रेडक्रस सोसाइटीलगायत सङ्घसंस्था तत्कालै मानवीय सहायताका सामग्री प्रदान गरेको छ ।

नेपाली कांग्रेसले बाढीबाट प्रभावित ७५ परिवारका लागि त्रिपाल, खाद्यान्न सामग्री र नगद प्रदान ग-यो । यस्तै, राष्ट्रिय लोक तथा दोहोरी गीत प्रतिष्ठान बागलुङले रु एक लाख ५० हजार बराबरको खाद्यान्न र लत्ताकपडा सहयोग गरेको अध्यक्ष गणेश पौडेलले बताउनुभयो । यता, गलकोट समाज जापानले शुरु गरेको अभियानमार्फत दुई दिनमै रु १० लाखभन्दा बढी रकम उठेको जनाइएको छ । ‘इनसाइड बागलुङ’ र ‘युएसबी सेवा प्रालि’ ले थालेको राहत अभियानमा हालसमम रु एक लाख २० हजार सङ्कलन भएको प्रालिका अध्यक्ष आकाश ‘युएसबी’ थापाले बताउनुभयो ।

जिल्ला सहकारी सङ्घले पनि राहत अभियान चलाउने भएको छ । सङ्घका पदाधिकारी र सदस्यहरुबाट रु ६० हजार सङ्कलन भइसकेको छ । सङ्घले देशभरका सहकारी सङ्घसंस्थालाई बाढी प्रभावितको सहयोगमा जुट्न आग्रह गरेको छ । सदरमुकामस्थित आदर्श सञ्चार सहकारी संस्था लिमिटेडले सञ्चालक, कर्मचारी र शेयर सदस्यबाट सहयोग जुटाइरहेको छ ।

यो पनिः राहत वितरण गर्न राष्ट्रिय जनमोर्चाको टोली ढोरपाटन पुग्दै