काठमाडौं । अस्ट्रेलियाको क्वीन्स्ल्याण्डस्थित एउटा घरमा छानोबाट दुईवटा अजिङ्गर खसेका छन् । पोथीका लागि जुध्दै गर्दा ती दुई अजिंगर घरभित्र खसेको हुनसक्ने अनुमान गरिएको छ । तर त्यहाँ पोथी सर्प भने फेला परेन ।

आफ्नो घरभित्र ठूलाठूला दुईवटा सर्प देख्दा घरधनी डेभिड टेट आश्चर्यचकित भएका थिए । तीमध्ये एउटा उनको शयनकक्षमा थियो भने अर्को चाहिँ बैठक कोठामा । तिनको कुल तौल २२ किलो भएको बताइएको छ ।

कार्पेट पाइथनको ती दुई सर्पको लम्बाइ २.८ मिटर र २.५ मिटर रहेको बताइएको छ । टेटले पहिले आफ्नो छतमा सर्पहरू घाम तापिरहेको देखेको बताएका छन् ।

छानोको अवस्था देखेपछि खोजी गर्दा उनले ती सर्प फेला पारे । त्यसपछि उनले सर्प समात्ने व्यक्तिलाई बोलाए । फेसबुकमा लेखिएको पोस्टमा टेटले आफ्नो छतबाट ती सर्प खसेको घर पुगेपछि मात्रै आफूले थाहा पाएको बताए । बीबीसी