गुलरिया । वनमौरीको घारबाट निस्किएका मौरीले टोकेर वीरबहादुर थारूको मृत्यु भएको छ ।

घरकै सिलिङमा रहेको वनमौरीको टोकाइबाट ठाकुरबाबा नगरपालिका–४ खैलार निवासी ४३ वर्षीय वीरबहादुर थारूको उपचारका क्रममा मृत्यु भएको हो ।

जिल्ला प्रहरी कार्यालय बर्दियाका प्रहरी नायब उपरीक्षक रेशम बोहराले कार्तिक २४ गते दिउँसो करिब १:०० बजे मौरीले टोकेपछि बेहोस अवस्थामा उपचारका लागि ठाकुरबाबा नगर अस्पताल, नेउलापुर भुरीगाउँ पुर्‍याइएको थियो ।

उपचारकै क्रममा सोही दिन दिउँसो ३ बजे चिकित्सकले उहाँलाई मृत घोषणा गरेको प्रहरी नायब उपरीक्षक बोहराले जानकारी दिए ।

वीरबहादुरको घरको सिलिङमा करिब दुई महिनादेखि पाँचोटा वनमौरीका घार रहेका थिए । मौरीको टोकाइबाट मृत्यु भएका थारूको शव पोस्टमार्टमका लागि जिल्ला अस्पताल बर्दिया ल्याइएको छ ।