महेश रिजाल, भालुबाङ ।
दाङको भालुबाङ अस्पतालमा स्क्रब टाइफस सङ्क्रमित रोगबाट बिरामीको सङ्ख्या बढ्दो क्रममा छ । यहाँ दैनिक एकदेखि तीन जनासम्म स्क्रब टाइफस सङ्क्रमित बिरामी आउने गरेका छन् ।
भालुबाङ अस्पतालले दिएको जानकारीअनुसार यो रोग मुसामा पाइने ब्याक्टेरिया र प्राय: जङ्गली मुसाको शरीरमा पाइने किर्नाको टोकाइबाट घरपालुवा जनावर वा मानिसमा सर्ने गर्दछ । मानिसबाट मानिसमा यो रोग सर्दैन ।
स्क्रब टाइफसका अल्सरजस्तो घाउ देखिने, किर्नाको टोकाइ देखिने, उच्च ज्वरो आउने, कामज्वरो आउने, थकान, बान्ता, वाकवाकी हुने, पेट दुख्ने, टाउको दुख्नेजस्ता प्रारम्भिक लक्षण हुन् । रोक बिग्रेमा मस्तिष्क, मृगौलामा समेत असर गर्ने अस्पतालले बताएको छ ।
यो घातक रोगसमेत रहेको हुँदा अहिलेसम्म नेपालमा यो रोगबाट १० भन्दा बढी मानिसको मृत्यु भइसकेको छ । भालुबाङ अस्पतालमा पनि यस रोगका बिरामी बढ्दो क्रममा छन् ।
यसको उपचार भने सामन्यतया एन्टिबायोटिक रहेको छ तर सो एन्टिबायोटिक चिकित्सकको परामर्श र आवश्यक जाँचपश्चात् लिनुपर्ने चिकित्सकको सुझाव छ ।
मुसाहरू झाडीमा बस्ने हुदा बुट लगाएर हिँड्ने, जनावर ह्यान्डल गर्दा सावधानी अपनाउनुपर्नेलगायतका उपाय रहेको अस्पतालका मेडिकल सुपरिटेन्डेन्ट डा. आकाश बेल्बासे बताउँछन् ।
उहाँका अनुसार यो ब्याक्टेरियल इन्फेक्सन ओरिएन्टा सुसुगान्सिया रोग हो ।
अस्पतालले यो रोग अहिले प्युठान जिल्लाको सरुमारानी गाउँपालिका क्षेत्रबाट आउने बिरामीमा अधिक सङ्क्रमण देखिएको बताएको छ ।
