काठमाडौँ । आरआर क्याम्पसका स्ववियु सभापति लोकेश खड्का, विश्वविद्यालय क्याम्पसका स्ववियु सचिव हिक्मत बुढा, स्ववियु सदस्य कुलबहादुर बुढा, स्ववियु सदस्य तेजप्रकाश सञ्जेल र विद्यार्थी रमन उपाध्यायको गिरफ्तारीको ११ विद्यार्थी सङ्गठनले विरोध गरेका छन् ।
२०८३ असोज २३ गते संयुक्त प्रेसवक्तव्य जारी गर्दै उनीहरूले उक्त गैरन्यायिक गिरफ्तारीको विरोध गर्दै स्ववियु नेताहरूको विनासर्त रिहाइ गर्न माग गरेका हुन् ।
असोज २२ गतेको घटनाको सन्दर्भमा त्रिवि पदाधिकारी र स्ववियु पदाधिकारीमाझ सौहार्दपूर्ण वातावरणमा छलफल भइसकेपछि उपकुलपतिको कार्यालय परिसरबाट विद्यार्थी नेताको गिरफ्तारी भएको उनीहरूले स्पष्ट पारेका छन् ।
स्ववियुमाथिको कथित प्रतिबन्धपछि त्रिवि प्रशासनले विद्यार्थीका मागलाई लगातार बेवास्ता गर्दै आएको बताउँदै उनीहरूले गिरफ्तार विद्यार्थीको रिहाइ नगरिए उत्पन्न परिस्थितिको जबाफदेही सरकार नै हुने चेतावनी दिइएको छ ।
यस्तो छ, संयुक्त प्रेस वक्तव्यको पूर्ण पाठ :
“त्रिभुवन विश्वविद्यालयको उपकुलपतिको कार्यालय परिसरबाट स्वतन्त्र विद्यार्थी युनियनका पदाधिकारी तथा विद्यार्थीलाई प्रहरीले गैरन्यायिक गिरफ्तारी गरेको घटनाप्रति संयुक्त विद्यार्थी आन्दोलन गम्भीर आपत्ति प्रकट गर्दै उक्त घटनाको घोर निन्दा तथा भत्र्सना गर्दछ, साथै गिरफ्तार गरिएका सम्पूर्ण विद्यार्थी साथीहरूलाई विनासर्त तत्काल रिहा गर्न प्रहरी प्रशासनसमक्ष जोडदार माग गर्दछ ।
२०८३ असोज २२ गते त्रिभुवन विश्वविद्यालयका पदाधिकारी र स्वतन्त्र विद्यार्थी युनियनका पदाधिकारीबिच उत्पन्न परिस्थितिका सम्बन्धमा छलफल गर्न २०८३ असोज २३ गते उपकुलपतिको कार्यालयमा वार्ता तथा छलफल कार्यक्रम आयोजना गरिएको थियो । उक्त छलफल विश्वविद्यालय प्रशासन र स्ववियु प्रतिनिधिबिच सहमति कायम भई सौहार्दपूर्ण वातावरणमा सम्पन्न भइसकेपछि पनि प्रहरीले उपकुलपतिको कार्यालय परिसरबाट आरआर क्याम्पसका स्ववियु सभापति लोकेश खड्का, विश्वविद्यालय क्याम्पसका स्ववियु सचिव हिक्मत बुढा, स्ववियु सदस्य कुलबहादुर बुढा, स्ववियु सदस्य तेजप्रकाश सञ्जेल तथा विद्यार्थी रमन उपाध्यायलाई गैरन्यायिक गिरफ्तारी गरेको छ ।
यस प्रकारको घृणित घटनाले विद्यार्थीको लोकतान्त्रिक अधिकार, शान्तिपूर्ण गतिविधि तथा संवादमार्फत समस्या समाधान गर्ने प्रक्रियामाथि वर्तमान सरकारले अपनाउँदै गएको फासिवादी चरीत्रलाई उदाङ्गो पारेको छ । विद्यार्थी सङ्गठनमाथि सरकारको कथित प्रतिबन्धको घोषणापछि सङ्गठनले लगातार वार्ता र छलफलको माग गरे पनि त्यसलाई बेवास्ता गर्ने र सम्मानित सर्वोच्च अदालतको अल्पकालीन अन्तरिम आदेशको उल्लङ्घन गर्ने काम सरकार र त्रिवि प्रशासनबाट लगातार हुँदै आइरहेको छ । यो घटना पनि त्यसकै निरन्तर हो ।
संयुक्त विद्यार्थी आन्दोलन गिरफ्तार गरिएका सम्पूर्ण विद्यार्थी साथीहरूलाई विनासर्त र कुनै पनि ढिलाइ नगरी अविलम्व रिहाइ गर्न प्रहरी प्रशासनसमक्ष कडा शब्दमा माग गर्दछ, साथै विद्यार्थी साथीहरूलाई तत्काल रिहा नगरेमा त्यसबाट उत्पन्न हुने परिस्थितिको जिम्मेवारी सम्बन्धित प्रहरी प्रशासन र सरकारले लिनुपर्ने स्पष्ट गर्दछ ।
गिरफ्तार विद्यार्थी साथीहरूलाई तत्काल रिहा गर !
विद्यार्थी एकता जिन्दावाद !
संयुक्त विद्यार्थी आन्दोलन जिन्दावाद !
यता, विद्यार्थी नेताहरूलाई प्रहरीले पक्राउ गर्नुको कारण उपकुलपति डा. भोला थापामाथि दुव्र्यवहार गरेको आरोप लगाइएकोमा त्यसलाई उनीहरूले अस्वीकार गरेका छन् ।
त्रिभुवन विश्वविद्यालयको सिनेट बैठकपछि स्ववियु हटाउने तयारी भइरहेको आरोप लगाउँदै विद्यार्थी नेताहरूले उपकुलपति थापा विरुद्ध तीव्र विरोध जनाएपछि त्यसको प्रतिक्रियास्वरूप विद्यार्थी नेताको गिरफ्तारी भएको बताइउको छ ।
पक्राउ परेका विद्यार्थी नेताहरूलाई हाल प्रहरी परिसर भद्रकालीमा राखिएको बताइएको छ ।
स्ववियु विश्वविद्यालयको पनि विरोध
त्यस्तै विश्वविद्यालय क्याम्पसको स्ववियुले पनि प्रेसविज्ञप्ति जारी गर्दै विद्यार्थी नेताको गिरफ्तारीको विरोध गरेको छ । आजै अध्यक्ष दीपकराज जोशीको हस्ताक्षरमा प्रेसवक्तव्य जारी गर्दै गिरफ्तारीको विरोध गरिएको हो ।
विश्वविद्यालयको स्वायत्ततामाथिको नियन्त्रण कदापि स्वीकार नहुने स्पष्ट पार्दै उनीहरूले संवाद र सहकार्यको माध्यमबाट समस्या समाधान गर्न माग गरिएको छ ।
