काठमाडौँ । धर्मनिरपेक्ष मुलुक नेपालमा मन्दिरमा प्रवेश गरेबापत दुई जना पक्राउ परेका छन् ।
पशुपतिनाथ मन्दिरको मूल परिसरभित्र प्रवेश गरेबापत् सुनसरीको इटहरी निवासी ओसिम अन्सारी र उनकी पत्नी प्रियङ्का परियारलाई प्रहरीले पक्राउ गरेको हो ।
अन्सारी दम्पत्तिले पशुपतिनाथ मन्दिरमा प्रवेश गरेर भिडियो बनाएका थिए । उक्त भिडियो भाइरल भएपछि पशुपति क्षेत्र विकास कोषले प्रहरीमा जाहेरी दिएको थियो । सोही जाहेरीको आधारमा निज दुवैलाई पक्राउ गरिएको प्रहरीले जनाएको छ ।
अन्तरजातीय विवाह गरेका अन्सारी र परियारलाई सुनसरी प्रहरीको सहयोगमा नियन्त्रणमा लिई थप अनुसन्धानका लागि काठमाडौँस्थित प्रहरी वृत्त गौशाला पठाइएको छ ।
गैरहिन्दुका लागि प्रवेश निषेध मानिने पशुपतिनाथको मुख्य मन्दिर परिसरमा पुगेर उनीहरूले भिडियो खिचेका थिए । उक्त भिडियो सामाजिक सञ्जालमा भाइरल भएपछि धार्मिक आस्था र मर्यादामाथि आँच पुगेको भन्दै तीव्र आलोचना र विरोध भएको थियो ।
चौतर्फी विरोध र विवाद सिर्जना भएपछि कोषले प्रहरीमा औपचारिक जाहेरी दिएको थियो । सोही जाहेरीका आधारमा उनीहरूलाई पक्राउ गरी कानुनी कारबाही तथा थप अनुसन्धानको प्रक्रिया अघि बढाइएको प्रहरीले जनाएको छ ।