काठमाडौँ । विश्व कीर्तिमानी गीतकार तथा उपन्यासकार डा डिआर उपाध्यायलाई मानार्थ विद्यावारिधि प्रदान गरिएको छ ।
साहित्य तथा सङ्गीत क्षेत्रमा पुर्याएको योगदानको कदर गर्दै किर्गिस्तानस्थित आइएलपिएमएस विश्वविद्यालयले उनलाई मानार्थ डाक्टर अफ ह्युमन लेटर्स (डिचएल) उपाधिबाट सम्मान गरेको हो ।
भारतको जयपुरस्थित इन्टरनेसनल सेन्टरमा आयोजित विशेष समारोहमा विश्वविद्यालयका प्रतिनिधि तथा अन्य प्रतिष्ठित अतिथिले डा उपाध्यायलाई मानार्थ विद्यावारिधिको प्रमाणपत्र प्रदान गरेका थिए ।
कार्यक्रमको प्रमुख अतिथिमा राजस्थानका उपमुख्यमन्त्री डा. प्रेमचन्द बैरवा रहेका थिए भने विशिष्ट अतिथिमा राजस्थान विधानसभाका सभामुख वासुदेव देवनानी, राजस्थान विधानसभाका पूर्व सदस्य अशोक परनामी, राजस्थान विधानसभाका सदस्य बालमुकुन्दाचार्य, राज्यमन्त्री श्रीमती एकता अग्रवाल, एक्सक्लुसिभ वल्र्ड रेकड्र्सका ब्रान्ड एम्बेसेडर डा रामसिंह चौहान, पद्मश्री पुरस्कार विजेता, वरिष्ठ चिकित्सक तथा मुटुरोग विशेषज्ञ डा एम वलीलगायतका रहेका थिए ।
विश्वविद्यालयले जारी गरेको प्रमाणपत्र तथा सम्मानपत्रमा साहित्य र सङ्गीत क्षेत्रमा उनको योगदान, उपलब्धि, समर्पण तथा समाजमा पारेको प्रभावको प्रशंसा गरिएको छ ।
समारोहमा प्रदान गरिएको स्मृतिचिह्नमा समेत उनलाई साहित्य तथा सङ्गीत क्षेत्रमा उत्कृष्ट योगदान र विशिष्ट उपलब्धिका लागि सम्मान गरिएको उल्लेख छ । यो सम्मानले नेपाली साहित्य तथा सङ्गीत क्षेत्रमा डा उपाध्यायले पुर्याएको योगदानलाई अन्तर्राष्ट्रिय स्तरमा समेत सम्मान मिलेको जनाइएको छ ।
समाजशास्त्रमा सन् २००० मा विद्यावारिधि गरेका डा उपाध्यायलाई यसअघि विभिन्न नौ विश्वविद्यालयले मानार्थ विद्यावारिधि प्रदान गरिसकेका छन् । आइएलपिएमएस विश्वविद्यालयबाट प्राप्त उपाधि उहाँको दशौँ मानार्थ विद्यावारिधि हो । यसअघि अमेरिका लगायत विभिन्न देशका विश्वविद्यालयबाट उनलाई नौओटा मानार्थ विद्यावारिधिको प्रमाणपत्र प्रदान गरिएको थियो ।
गीतसङ्गीत तथा साहित्यका विभिन्न विधामा सक्रिय डा उपाध्यायले हालसम्म १५३ ओटा विश्व कीर्तिमान कायम गरेको जनाइएको छ । उनका १७ भन्दा बढी उपन्यास, तीन गीतिपुस्तक तथा ३६ ओटा एल्बम प्रकाशित तथा सार्वजनिक भइसकेका छन् ।
उनका करिब दुई सय ५० गीत सार्वजनिक भएका छन् भने सयौँ गीतका भिडियोसमेत निर्माण भएका छन् । डा उपाध्यायको पछिल्लो उपन्यास ‘आशक्ति’ तथा कवितासङ्ग्रह ‘अन्तसंस्करण’ रहेको छ भने हालै दुई भजन ‘श्रीराम’ र ‘हरे कृष्ण’ स्रोतादर्शकमाझ आएका छन् ।