काठमाडौँ । पश्चिम नेपालका गण्डकी, लुम्बिनी, कर्णाली र सुदूरपश्चिम प्रदेशमा भारीदेखि धेरै भारी वर्षा भइरहेकाले बाढी, पहिरो र डुबानको जोखिम बढेको छ। जल तथा मौसम विज्ञान विभागको मौसम पूर्वानुमान महाशाखाले जोखिमयुक्त क्षेत्रमा ‘सुन्तला’ र ‘रातो’ रङको चेतावनी जारी गर्दै उच्च सतर्कता अपनाउन आग्रह गरेको छ।
महाशाखाका अनुसार पछिल्लो २४ घण्टामा पाल्पाको अर्चलेमा २०८ मिलिमिटरभन्दा बढी वर्षा मापन भएको छ। पश्चिमी क्षेत्रमा आज र भोलिसम्म भारी वर्षाको सम्भावना रहे पनि त्यसपछि मौसम क्रमशः सुधार हुँदै जाने पूर्वानुमान छ।
मौसमविद् रोजन लामिछानेका अनुसार भारतको मध्य प्रदेश र उत्तर प्रदेश आसपास विकसित न्यूनचापीय प्रणाली तथा बङ्गालको खाडीबाट आएको जलवाष्पयुक्त हावाका कारण पश्चिम नेपालमा बढी वर्षा भएको हो।
पूर्वी क्षेत्रमा वर्षा घट्दै गएको र सोमबारदेखि देशभरको मौसम सामान्यतः सफा रहने महाशाखाले जनाएको छ। पहिरो, डुबान तथा कटानको जोखिम भएका क्षेत्रका बासिन्दा र सम्बन्धित निकायलाई आवश्यक पूर्वतयारी र सतर्कता अपनाउन मौसमविद् लामिछानेले आग्रह गरेका छन्।
