जनक बिसी, दक्षिण भारत

युगदर्शन, तिमी जन्मेर आठौँ वर्षमा प्रवेश गर्दै गर्दा
दर्बिलो र गौरवपूर्ण बनेका छौ,
किनभने तिमीले गरिब, श्रमिक
र देश–जनताका समाचार लेखिरहँदा
तिमीलाई हेरेर अवसरवादमा रमाउनेहरू पनि
विशेष रूपमा देखिएका छन्।

युगदर्शन, तिमी आठौँ वर्षमा प्रवेश गर्दै गर्दा
कठिनतम चुनौतीहरू पनि सामना गर्‍यौ।
विशेष गरी देश प्रतिगमनतर्फ दौडिरहेका बेला
भारतीय साम्राज्यवादको संघीयता,
अमेरिकी साम्राज्यवादको एमसीसी र एसपीपीविरुद्ध
संघर्ष गर्दै निरन्तर कलम चलायौ।

युगदर्शन, तिमी आठौँ वर्षमा प्रवेश गर्दै गर्दा
झन् काला र हरिया क्रान्तिकारीहरू पनि देख्यौ।
देशको सम्पत्ति २०८२ भदौ २३ र २४ गते
सर्वोच्च अदालतदेखि सिंहदरबारलगायत
देशभर खरानी भएको पनि देख्यौ।

झन् डरलाग्दो त
२०८२ फागुन २१ गतेको निर्वाचनपछि बनेको
‘खराने’ सरकारको उपस्थितिबाट
राष्ट्रियता, गणतन्त्र र धर्मनिरपेक्षता
धरापमा परेको अवस्था हो।
युगदर्शन, तिमी झन् कठिन लडाइँमा
देश र जनताको भविष्यका लागि
सम्झौताहीन रूपमा कलम चलाइरहू।

यसै शुभेच्छासहित
युगदर्शन राष्ट्रिय साप्ताहिकलाई
आठौँ वर्षको हार्दिक शुभकामना!
२३ सेप्टेम्बर २०२६