भैरवराज रेग्मी

युगदर्शन डटकम आजदेखि आठौँ वर्षमा प्रवेश गरेको छ । यस अवसरमा हार्दिक बधाई तथा शुभकामना व्यक्त गर्न चाहन्छु । यस सिलसिलामा युगदर्शन परिवारका सम्पूर्ण सदस्यहरूसँग बधाई तथा शुभकामना आदान–प्रदान गर्न चाहन्छु ।

युगदर्शनको जन्मको प्रसव पीडा अहिले पनि स्मरण गर्न चाहन्छु । उपभोक्तावादको भुमरीभित्र जन्मन पुगेको युगदर्शनलाई आठौँ वर्षसम्म आइपुग्न धेरै कष्ट, संघर्ष र मेहनत गर्नुपरेको छ । भोको पेट र प्राविधिक अभावका बीच पनि त्याग, समर्पण र आदर्शलाई आत्मसात् गर्दै आठौँ वर्षसम्म आइपुग्दा अब युगदर्शन आत्मनिर्भरताको बाटोतर्फ लम्किरहेको हामी सबैले महसुस गरिरहेका छौँ । अब यो आत्मनिर्भर र सशक्त बन्दै पत्रकारिताको आफ्नो जिम्मेवारी अझ प्रभावकारी रूपमा निर्वाह गर्नेछ भन्ने हामीले अपेक्षा गरेका छौँ ।

सीमित साधन र स्रोतका बाबजुद एल्गोरिदमको यो भुमरीमा नेपाली जनताको अभाव, पीडा, दुःख र कष्टका सूचनाहरूलाई यसले निरन्तर प्रवाह गर्न सफल हुँदै गइरहेको छ । यस क्रममा नेपाल राष्ट्रमाथि आइरहेका गम्भीर संकट र विपत्ति, राष्ट्रद्रोह, प्राकृतिक विपत्ति तथा राजनीतिक अवसरवादका विषयमा निर्भीकतापूर्वक आधिकारिक र प्रमाणिक सूचना प्रवाह गर्दै युगदर्शन सफलतापूर्वक अगाडि बढिरहेको छ ।

नेपाली राष्ट्रियता र नेपाली जनताको साथसाथै विश्वका उत्पीडित जनताको आवाज उठाउने मिसन बोकेको युगदर्शनले अनुशासित र आत्मनिर्भर पत्रकारिताको बाटो अवलम्बन गर्दै विश्वसनीय, आधिकारिक र प्रमाणिक सूचनाहरू पस्कँदै आइरहेको छ । सूचना प्रसारणको सिलसिलामा यसको दायरा पनि निरन्तर विस्तार हुँदै गइरहेको छ ।

अब युगदर्शन परिवारका सम्पूर्ण अंगहरूले सूचना प्रवाहको जिम्मेवारीलाई अझ सशक्त र प्रभावकारी रूपमा अगाडि बढाउँदै आफ्‌नो दायित्वबोधलाई थप गहिरो बनाउन आवश्यक छ । बदलिँदो सूचना प्रविधि र सञ्चारको परिवेशमा विश्वसनीयता, तथ्यपरकता, निष्पक्षता र जनउत्तरदायित्वलाई केन्द्रमा राख्दै युगदर्शनले आफ्‌नो यात्रालाई अझ उचाइमा पुर्‍याउने विश्वास लिएको छु ।

अन्त्यमा, युगदर्शन डटकमको आठौँ वर्ष प्रवेशको अवसरमा सम्पूर्ण युगदर्शन परिवारमा पुनः हार्दिक बधाई तथा शुभकामना व्यक्त गर्दछु । यसको निरन्तर प्रगति, सफलता, विश्वसनीयता र सशक्त यात्राको कामना गर्दछु ।