काठमाडौं । अर्थसचिव घनश्याम उपाध्यायले नेपालको अर्थतन्त्र सुस्त रहे पनि सुधारको बाटोमा रहेको बताएका छन्। नेपाली युवा उद्यमी मञ्च, ललितपुर च्याप्टरले आयोजना गरेको ‘थिंक ट्यांक सिरिज’मा बोल्दै उनले आर्थिक वृद्धिदर सुस्त, निजी लगानी कमजोर, पूँजीगत खर्च न्यून, व्यापार घाटा उच्च र उत्पादकत्व कमजोर रहेको बताए।
उपाध्यायले पछिल्ला दशकहरूमा नेपालको औसत आर्थिक वृद्धि ४ प्रतिशतभन्दा कम रहेको उल्लेख गर्दै स्वदेशी निजी लगानी र प्रत्यक्ष वैदेशिक लगानी (एफडीआई) बढाउन लगानीको वातावरण सुधार गर्नुपर्नेमा जोड दिए। पूँजीगत खर्च प्रभावकारी रूपमा परिचालन गर्न सके रोजगारी सिर्जना, आर्थिक वृद्धि र निजी लगानी विस्तारमा सहयोग पुग्ने उनको भनाइ थियो।
नेपालको व्यापारमा आयातको हिस्सा करिब ९० प्रतिशत र निर्यातको १० प्रतिशत रहेको उल्लेख गर्दै उनले उत्पादन तथा निर्यात बढाउनुपर्ने बताए। यद्यपि, बढ्दो रेमिट्यान्स, जलविद्युत् विस्तार, मध्यम मुद्रास्फीति, न्यून ब्याजदर र पर्याप्त तरलतालाई अर्थतन्त्रका सकारात्मक पक्षका रूपमा उनले प्रस्तुत गरे। सार्वजनिक ऋण जीडीपीको करिब ४३ प्रतिशत रहेको भन्दै त्यसलाई उत्पादकत्व, औद्योगिकीकरण र पूर्वाधार विकासमा उपयोग गर्नुपर्ने उनले बताए।
मञ्चका अध्यक्ष आभुषणज्योति कंशाकारले मध्यम वर्गीय उद्यमी तथा व्यवसायीका समस्या सम्बोधन हुने गरी नीति बनाउनुपर्ने बताए। पछिल्ला प्राकृतिक विपत्ति तथा अन्य घटनाबाट मध्यम वर्गीय व्यवसायी प्रभावित भएको उल्लेख गर्दै उनले उनीहरूलाई पुनः व्यवसायमा फर्कने वातावरण बनाउन सरकारसँग आग्रह गरे।
ललितपुर च्याप्टरका अध्यक्ष अनुकुल श्रेष्ठले सरकारी नीति र युवा उद्यमीका सरोकारबीच ठूलो दूरी रहेको बताए। उक्त दूरी कम गर्न ‘थिंक ट्यांक सिरिज’ सुरु गरिएको र आगामी दिनमा पनि नीतिगत बहसलाई निरन्तरता दिइने उनले बताए।
