रवि पौडेल ##

मोबाइलमा रिङ बजिरहेको रहेछ
पछि उभिएको साथीले
कोट्याउँदै भन्यो–
“सर, हजुरको मोबाइलमा रिङ बजेको छ”
हत्तपत्त गोजीबाट निकालेर
फोन उठाएँ
हेलो भन्न नपाउँदै
“कहाँ छस् बाबू ?”
आमाले सोधिहाल्नुभयो
मैले भनेँ– लाइनमा छु
“कस्तो लाइन बाबु ?”
उहीँ त हो आमा
पासपोर्टको लाइन

धेरै दिनपछि आज फेरि
मामाले फोन गर्नुभयो
फोन उठाउँदै
नमस्कार मामाजी भनेँ
“होइन भानिज, आजकल कता हुनुहुन्छ ?
भेट पनि हुँदैन”
मामाले प्रश्न गर्नुभयो
कता हुनु मामाजी ?
लाइनमा छु
“कस्तो लाइन ?
के को लाइन ?”
बाबालाई एकदमै गाह्रो भएर
अस्पतालको लाइनमा छु

अस्ट्रेलियाबाट दिदीको फोन आयो
फोन उठाउँदै गफिन थालेँ
“भाइ के छ खबर ?”
दिदीले सोध्नुभयो
ठिकै छ दिदी
यहाँ लाइनमा छु
“केको लाइन भाइ ?”
ए दिदी ग्याँस सकिएर
“ग्याँसको नि लाइनमा बस्नुपर्छ ?
यहाँ त भाइ बुकिङ गरे
घरमै आउँछ”
होइन दिदी यहाँ त लाइनमा बस्नुपर्छ
अहिले लाइनमा छु

धेरै दिनपछि जापानबाट भान्जीले
फोन गर्नुभयो
उठाउन नपाउँदै
मामा, हजुरआमा भेटिनुभयो
रुन्चे स्वरमा जबाफ फर्काउँदै
भोटेकोशीको बाढीले लग्यो भान्जी
आमालाई
अहिले टिचिङ अस्पतालमा
आफन्तको खोजीमा
लाइनमा छु

धेरै दिनपछि कतारबाट
भाइले फोन गर्‍यो
फोन उठाएँ
अमिलो मन भएको थियो
भाइले भन्यो–
“आमा भेटिनुभयो ?”
अँ हँ कहाँ भेटिनु ?
फेरि सोध्यो–
“अहिले के गर्दै हुनुहुन्छ त ?”
बाढीपीडितहरूलाई आएको राहत
हात थाप्न
लाइनमा छु भाइ